Atualità
Festa dl’Europa, Kompatscher: „Pesc, unité y solidarieté“
En ocajiun dla festa dl’Europa fej le presidënt Kompatscher apel a n’UE unida te n spirit de pesc, sussidiarité y solidarieté.
Ai 9 de ma dl 1950 â le Minister por i afars esters franzej, Robert Schumann, albü na pröma idea de n’area deboriada al’intern dl’Europa: chël ê le pröm vare dla nasciüda dl’Uniun europeica sciöche i la conesciun aldedaincö, y propi por chësta gaujia vëgnel festejé indoman, ai 9 de ma, la festa dl’Europa. Dala nasciüda él spo nasciü na forma de colaboraziun sterscia che mëss afronté atualmënter ince sfidades complicades. „La pesc y l’unité é i valurs fondamentai dl’Uniun europeica, sciöche ince l’atenziun di dërc umans, dl’avalianza dles oportunités, dla liberté, dla democrazia y dl dërt. Döt chësc unësc l’Europa y sü zitadins, y le resultat dles lites presidenziales tla Franzia desmostra cun sü valurs é la dërta resposta ales sirenes dl nazionalism“, á dit Kompatscher.
Aladô dl presidënt südtirolej, „un nos debojëgn dl’Uniun europeica, y la UE á debojëgn de Regiuns sterscies y atives, che sides bunes da concretisé le spirit europeich te aziuns y fac concrec cun tl zënter nia ma l’unité, mo ince le respet dla diversité. Propi le Südtirol, sciöche regiun de confin y de punt danter l’Europa zentrala y le Mer Mediteran pó ester odüda sciöche model de regiun europeana, te chëra che i prinzips dla sussidiarité y dla solidarieté é la fondamënta por la colaboraziun.“
USP
