Atualità
Südtirol Pass abo+: an pó bele sëgn fá le renovamënt
Por l’Abo+ él bele sëgn poscibl da fá domanda por l’ann scolastich 2017/18 te na manira asvelta y online da ciasa.
Söporjö 80.000 scolars, studënc y lerneri á fat atualmënter l’abonamënt por le Südtirol Abo+ che ti consënt da adoré i mesi dl trasport publich te döt Südtirol. La cherta costa 20 euro o 150 euro al’ann por scolars, lerneri y studënc. “Chi che ajornëia l’Abo+ bele abonora ne á nia bria de se fistidié da messëi renové la cherta tratan les vacanzes y pó adoré l’abonamënt renové bele dai pröms dis de scora inant”, dij l’assessur por la mobilité Florian Mussner.
Sön la plata internet www.suedtirolmobil.info él poscibl da ajorné l’Abo+ o da fá domanda por le pröm iade. Implü él ince poscibl da paié ite la cuota anuala online. Zënza renovamënt é l’Abo+ atualmënter varënt ciamó cina ai 15 de setëmber dl 2017.
Por le renovamënt anual dl Abo+ é la prozedöra online scialdi saurida: al é ma nezesciar da inserí la data de nasciüda, le codesc fiscal, le numer dl Abo+ y la scora. Do l’inserimënt de chisc dac é i vari ciamó dui: aprovaziun dl renovamënt y paiamënt dla cuota anuala.
Por ci che reverda la domanda por podëi adoré n Abo+ por le pröm iade él nezesciar da dé jö na copia o na foto dl documënt d’identité dla porsona che adora l’abonamënt. La foto o la copia pó gní injuntades online sön le cunt personal o an pó ince la mené tres na email cina 15 dis do l’iscriziun. Sce na foto é bele presënta tl sistem spo ne él nia nezesciar da fá chësc vare.
Por i jogn y les jones sot ai 18 agn mëss n responsabl por l’educaziun fá domanda. Al educadú ti gnarál ince damané i dac personai y le codesc fiscal dl studënt o lerner.
La cuota anuala pó gní paiada online cun la cherta de credit o ince tres le homebanking cun les banches abilitades al sistem. Implü él ince poscibl da paié la cuota tres les sistem de paiamënt SEPA Direct Debit o pro les portines dl sistem de trasport publich südtirolej mostran l’Abo+. Por plü informaziuns sön l’abonamënt Abo+ prëibel vijité la plata internet: www.suedtirolmobil.info.
USP
