Atualità
Convëgn internazional sön les furnadoies: trend y sfidades futures
340 esperc da döt le monn é presënc al convëgn sön les furnadoies che é gnü inaudé incö a Balsan dal presidënt Kompatscher y dal assessur Mussner.
La pröma furnadoia abilitada por le transport publich de porsones é gnüda fata sö propi a Balsan: al se trata dla furnadoia che porta da Balsan cité al Col sura Balsan (Kohlern) che é jüda en funziun tl 1908. Söporjö 110 agn dedo él indô Balsan che é tl zënter dl monn dle furnadoies cun le Convëgn internazional dles furnadoies dl’OITAF. Do Paris, Roma, San Francisco o Barcellona él sëgn la ota de Balsan cun le convëgn che é gnü daurí incö ofizialmënter ai 7 de jügn tla Eurac a Balsan. L’OITAF é l’organisaziun che tol ite les trëi categories che laora tl setur dles furnadoies: chi che les fej sö, chi che les gestësc y les autorités che nen ciara sura. Dal 1985 él la sënta dl OITAF pro l’Ofize provinzial Furnadoies a Balsan. Le presidënt dl’organisaziun é Martin Leitner, che á rengrazié la Provinzia por le sostëgn al convëgn.
Esperc de livel internazional
Tratan le convëgn sarál 30 esperc che tignará sües relaziuns cun tematiches che ti jará a funz ales chestiuns tl setur dles furnadoies ti raiuns urbans y alpins y ince dles tematiches dl trasport, dl comfort, dl’architetöra y dla tecnica. Danter i esperc él Peter Schröksnadel (presidënt dl Österreichischer Skiverband), Pierre Lestas (presidënt dla federaziun franzeja di gesturs dles furnadoies), Sandro Lazzari (presidënt dl Dolomiti Superski) y César Dockweiler (CEO de Mi Teleferico de La Paz/Bolivia). “Le Südtirol é n teritore cun na seria de pioniers tl seturs dles furnadoies sides tl ciamp dl’industria co ince dla tecnologia alpina cun 369 implanc portamunt y 127 miliuns de passajiers y n volum d’afars por 296 miliuns de euro al ann”, á sotligné le presidënt Arno Kompatscher. “Les furnadoies vëgn ince adorades tres deplü sciöche soluziuns a tematiches complicades che reverda la mobilité alpina, mo ince chëra te cité”, á dit Kompatscher che á recordé l’importanza dles furnadoies sciöche meso de trasport sostenibl, scëmpl, comot y cun tröc vantaji.
Furnadoies: na soluziun saurida por chestiuns complicades
“Ti ultims 15 agn él gnü fat tröp tl Südtirol tl setur dla mobilité y al é ince gnü arjunt de gragn resultac por ci che reverda le coliamënt di mesi de trasport desvalis integran les furnadoies tl sistem dl trasport publich”, á afermé l’assessur Florian Mussner. Le Südtirol á svilupé cul tëmp na cultura speziala dles furnadoies, ince te localités plü piceres, insciö Mussner. Le presidënt dla OITAF, Martin Leitner, á definí les furnadoies sciöche “na pert fondamentala dl trasport publich pro ciafé soluziuns a problematiches complicades”, fajon l’ejëmpl dla furnadoia realisada a Medellin tla Colombia, o a chëra de Rio de Janeiro tl Brasile. N marcé che podess crësce tl dagní é aladô de Leitner l’Asia. Le titul dl convëgn è “Ropeways – motion and emotion/ Furnadoies trasport y emoziun” cun tl zënter nia ma le furnadoies te n contest urban mo ince sciöche mesi da se sposté sö por munt. L’evënt internazional jará a piz en vëndres ai 9 de jügn cun na mostra publica daverta dales 20.00 tl’Eurac a aBAlsan dal titul “Furnadoies – n pü de storia y coriosités”. L’entrada é debann.
Imajes dla daurida dl convëgn
https://we.tl/r152UebrIz
USP
Galaria dales fotografies
