Atualità
Te nü museums entrada a mez prisc cun l’EuregioFamily Pass
Tratan chësc fin dl’edema sará l’entrada a mez prisc por düc i possessurs dl EuregioFamily Pass te nü museums provinziai.
Na jita tla Fortëza de Franzensfest, na vijita al museum dl vin a Kaltern o tl monn dles mineores a Ridnaun, o ince tl Museum archeologich a Balsan: te indöt nü museums provinziai, partis sö sön 15 sëntes, sará l‘entrada en sabeda y domënia (ai 10 y 11 de jügn) a mez prisc por düc i possessurs dl EuregioFamily Pass.
Al se trata dla pröma aziun de promoziun dla cherta che dal pröm de jügn á sotituí le Südtirol Pass family. La cherta nöia ne pó nia ma gní adorada por le trasport publich local mo ince sciöche cherta vantaji te plü strotöres y botëghes sön döt le teritore provinzial. Al ne tolará nia pert a chësta promoziun le Touriseum, le museum sön le turism a Maran.
“Chësta sort de aziuns é importanta deache ara mostra sö i tröc vantaji dla cherta nöia cun alisiraziuns por les families che fej cosses deboriada”, á dit l’assessuria por la familia Waltraud Deeg. “Les families pó insciö vijité nosta provinzia y i museums, ince adoran i mesi dl trasport publich te na manira economica y sostenibla”, á sotligné l’assessur por la mobilité Florian Mussner.
L’EuregioFamily Pass ti é gnü mené tles ultimes edemes a düc i possessurs dl Südtirol Pass family. La cherta mëss gní ativada online sot a http://www.mobilitaaltoadige.info.
La registraziun por fá la cherta por le pröm iade mëss ince gní fata online. L’iscriziun costa 20 euro. La lista de düc i museums che tol pert é gnüda injuntada.
USP
