Atualità
Mattarella y Van der Bellen a Maran, le program dla zerimonia
En domënia ai 11 de jügn sará i presidënc dles Republiches de Talia y Austria a Maran. Le program dla zerimonia por i 25 agn dl apajamënt dl strit.
25 agn apajamënt dl strit: chësc é le titul dla zerimonia söl program por en domënia, ai 11 de jügn dl 2017, a Maran. Propi en chësta data, ai 11 de jügn dl 1992, ti á le minister por i afars cun l’ester austriach, Alois Mock, surandé al ambasciadú talian a Viena, Alessandro Quaroni, la nota che á stlüt jö le strit danter la Talia y l’Austria por ci che reverda la chestiun südtiroleja. Püc dis daldô, ai 19 de jügn, é l’apajamënt dl strit gnü consegné ales Naziuns Unides por l'aprovaziun definitiva. Te chisc dis, 25 agn dedô, gnará chësc passaje zentral por la storia dla Provinzia de Balsan recordé cun na zerimonia particolara a chëra che al tol ince pert, sön l’invit dl presidënt Arno Kompatscher, i dui presidënc dles Republiches dla Talia y dl’Austria, Sergio Mattarella y Alexander Van de Bellen.
Le program dl de
La zerimonia metará man dales 10.20 cun le presidënt dla Republica taliana, Sergio Mattarella, che röia adalerch cun le presidënt dla Provinzia Arno Kompatscher che ti dará le bëgnodü. Dales 10.25 sarál spo la ota dl presidënt dla Republica austriaca, Alexander Van der Bellen. Dales 10.35 ará i fotografs y i cameraman la poscibilité da fá n valgönes fotografies y da tó sö imajes dala rotunda dl Kurhaus. Dales 11.00 mët spo man la pert ofiziala dla zerimonia cun les relaziuns, aladô dl program, naota dl presidënt dla Provinzia Arno Kompatscher, spo dl presidënt dla Republica taliana, Sergio Mattarella, y dl presidënt dla Republica austriaca, Alexander Van der Bellen. La zerimonia jará spo a piz dales 12.20.
Informaziuns por i media y i zitadins
Al intern dl Kurhaus él gnü istalé na sala stampa tla pröma alzada, i jornalisć podará ti ciaré pro ala zerimonia da na postaziun aposta tla pröma alzada, i fotografs y i cameraman ará n’area dedicada aposta al intern dl salf prinzipal. Al podará ma jí ite tl Kurhaus les porsones che á completé les prozedöres d’acrediamënt pro le Commisariat dl Guern. Al ne é preodü degönes detlaraziuns ai media da pert di presidënc Mattarella y Van der Bellen. La zerimonia podará ince gní ciarada dal ví sön sön la plata Facebook dla Provinzia de Balsan ala misciun dla Rai Ladinia: http://www.raibz.rai.it/la/index.php?media=Ltvlive. Dötes les noeles y i ajornamënc dla zerimonia por i 25 agn dal apajamënt dl strit podará ince gní consultá söi accounc twitter dla Provinzia @LandSuedtirol o @ProvinciaBZ o ince tres i hashtag #Streitbeilegung25 y #quietanza25.
USP
Galaria dales fotografies
