Atualità
Young & Museum: d’isté debann cun l’abo+ te 55 museums
Por le terzo ann podará i jogn che á n Südtirol Pass abo+ vijité debann 55 museums tla Provinzia tratan l’isté.
Dai 17 de jügn cina ai 4 de setëmber podará dötes les jones y düc i jogn che á n Südtirol Pass abo+ vijité debann 55 museums dla Provinzia de Balsan. Al basta mostré l’abonamënt ala cassa y i jogn podará ince s‘anuzé dles ofertes ajuntives che vëgn pitades dai museums: conzerc, workshops, vijites acompagnades, teater y tröp d’ater. I museums che tol pert ala scomenciadia é ince sön la rëi dl trasport publich, chël ó dí che an pó adoré i mesi dl trasport publich por rové ala sënta di museums. L’aziun é gnüda a se le dé por merit dla colaboraziun garatada danter les Repartiziuns Museums y Mobilité.
“Cun chësta aziun orun avijiné i jogn ai museums sciöche sperses d’incuntada y de barat cultural y tl medemo momënt i motivé da adoré tres deplü i mesi dl trasport publich. Tratan la pröma ediziun él sté 2.700 i jogn che á anuzé l’oportunité, y l’ann passé indöt 4.200. I sperun che ince chësc ann sarál tröc jogn che tolará pert ala scomenciadia”, dij l’assessur competënt Florian Mussner. Dötes les informaziuns sön la scomenciadia é da ciafé online sot a www.musei-altoadige.it/youngmuseum. Sön la plata internet él ince da ciafé na lista cun düc i museums che tol pert y sön le percurs da rové ai museums.
USP
