Atualità
Dala Junta: aprové le Documënt de economia y finanza 2018-2020
La Junta á adoté incö le Documënt de economia y finanza provinzial por i agn 2018-2020: al é la basa por planifiché y atué les ativités dl’AP.
Le Defp (Documënt de economia y finanza provinziala) documentëia le svilup dla finanza dla Provinzia y conzed da fá n’analisa söi obietifs de guern y sön les aziuns nezesciares por arjunje i obietifs, aladô de n schema che pëia ia dala definziun dla strategia por rové a stabilí les ressurses che é davëi nezesciares. Le documënt vëgn elaboré dala Provinzia de Balsan cina ai 30 de jügn de vigni ann sön la basa dla normativa statala sön l’armonisaziun di bilanc. Le Defp 2018-2020 é gnü adoté incö dala Junta provinziala sön proposta dl presidënt Arno Kompatscher y costituësc la basa dles dezijiuns sön i programs da atué: tl Defp vëgnel definí, sön basa trienala, le cheder economich y finanziar dl Südtirol, les politiches strategiches y i vari concrec da apliché ales arees d’intervënt. Les diretives, i obietifs y les priorités é gnüdes elaborades sön la basa dl’Acordanza de coaliziun por la formaziun dla Junta y dl Plann de performance elaboré dales unités organisatives dl’Aministraziun provinziala.
Le documënt aprové incö dala Junta provinziala y spo presenté dal vizepresidënt Christian Tommasini cunta sö danter i obietifs prinzipai la continuaziun dla politica economica a sostëgn dla produtivité y dla competitivité tl Südtirol: insciö él preodü intervënc a bëgn dles impreses, mosöres de mioramënt dles arees y di insediamëc produtifs, na politica fiscala che á l’obietif da smendrí l’impat söi zitadins y sön les aziëndes (atualmëter alisiraziuns fiscales por 320 miliuns de euro). Al é indere gnü confermé la priorité de na politica de stabilité por ci che reverda le bilanz provinzial, dantadöt por merit dl Pat de garanzia fat cun le Govern tl 2014. Chësta acordanza stabilësc le contribut dla Provinzia de Balsan por la finanza publica y garantësc la poscibilité da adoré les ressurses che resta te na manira autonoma. Por ci che reverda la politica dl laur él bele gnü superé cun le 75,5 porcënt d’ocupaziun locala un di obietifs dl'UE por le 2020 (ocupaziun che dess rové al 75 porcënt tl 2020 te döta l’UE pro la popolaziun danter i 20 y 64 agn). La Junta á definí da rové al 80 porcënt d’ocupaziun ti proscims agn, la dejocupaziun é atualmënter al 3,7 porcënt (te döta la Talia 11,9 porcënt).
Danter i intervëc sön chi che la Provinzia ó investí ti proscims agn él i seturs dla archirida y dl svilup cun n aumënt di investimënc che atualmënter fej fora 1 porcënt dl PIL (l’obietif europeich é da rové al 3 porcënt). Le cheder general dl Defp, che gnará sëgn mené inant al Consëi provinzial, confermëia che i dac sön l'andamënt sozio-ecomonich dl Südtirol é positifs ince por ci che reverda l’export y la spëisa publica. TE na manira particolara, insciö á recordé Tommasini, por ci che reverda le PIL él da registré n trend de chersciüda economica stabila: la porzentuala de chersciüda dl PIL real prevëiga por le 2017 n aumënt dl 1,5 porcënt (tla Talia 0,9 %). Cun n PIL a ce de 41.100 euro é la Provinzia de Balsan al pröm post tla Talia, dan la Lombardia cun 35.900 euro y la Provinzia de Trënt cun 34.600 euro.
USP
Galaria dales fotografies
