Atualità
Dala Junta: #viajésmart, mosöres por la mobilité sostenibla
Aziuns desvalies tl pachet de mosöres #viajésmart. Le Südtirol sciöche ejëmpl por la mobilité sostenibla, contribuc a chi che investësc tla mobilité eletrica.
Agenzia por l’ambiënt, Departimënc provinziai por l’economia, l’energia y l’ambiënt y la mobilité, Consorz di Comuns, Uniun energia Südtirol SEV, Zënter por l’idrogen IIT, Strotöres trasport Südtirol STA y Carsharing: chëstes é les organisaziuns che colaborëia tl grup de laur Green Mobility cun l’obietif da cherié na seria de mosöres desvalies por la mobilité sostenibla sot al moto #viajésmart. Tratan la sentada dla Junta provinziala da incö ai 20 de jügn á la Junta provinziala inciarié de plü strotöres da atué na seria de mosöres bele planificades, ince por ci che reverda les alisiraziuns preodüdes por les impreses che cumpra veicui eletrics o staziuns da ciarié sö eletriches. Dal’intermodalité ai mesi publics, dai trus dles rodes a chi da jí a pe cina ala realisaziun de infrastrotöres nöies: i intervënc preodüs tl setur dla Green mobility é cotanc. “Düc chisc intevënc á l’obietif da sconé la sensibilisité de nosc ecosistem alpin cun l’obietif da arjunje i traverc dal punt de odüda dla sconanza dl ambiënt”, sotlignëia l’assessur por l’ambiënt Richard Theiner. “Bele n cuarto di abitanc dl Südtirol adora mesi publics y chësc é n gran resultat. I podun impó ciamó fá de plü te chësc setur dla mobilité individuala: vigni zitadin é chiló damané da fá süa pert a bëgn dl ambiënt y dla sanité”, dij l’assessur por la mobilité Florian Mussner.
Mobilité eletrica
Adöm cun l’Agenzia por l’ambiënt gnarál lauré fora n plann de plü agn por cherié na rëi capilara de staziuns da ciarié sö eletriches por veicui eletrics, cun ince na seria de novités concretes. Cina la fin dl mëis gnarál aprové tl Consëi provinzial na norma de lege che conzed da ativé i contribuc por la cumpra de auto eletriches da pert de privac (cina a 4.000 euro de contribut partis sö danter Provinzia y conzescionars). La Junta provinziala á indere bele aprové i contribuc a bëgn dles aziëndes. Le contribut ales impreses é de 2mile euro por i veicui eletrics a bateria y a idrogen, a chi che al röia ciamó lapró 2mile euro da pert di conzescionars. Le sostëgn é indere de 1000 euro por i veicui “ibridi plug-in”, a chi che al röia lapró la medema soma da pert di conzescionar. Por la cumpra de veicui eletrics sön dui o trëi rodes él la Provinzia che prevëiga n contribut provinzial dl 30 porcënt dl prisc complessif pro les rodes eletriches cargo (portada minima de 150 kg) cina al mascimo de 1500 euro. Pro les staziuns da ciarié sö eletriches él preodü n contribut de 70 porcënt dl prisc complessif cina al mascimo de 1000 euro. Les domdanes pó gní presentades cina ai 31 de agost, dal proscim ann sarál poscibl da fá domanda bele dai 30 de jügn.
D’atri compic
La Repartiziun Natöra, paesaje y svilup dl teritore se fistidiará dla planificaziun de na seria de propostes por la gestiun dl trafich ti Comuns por ci che reverda auti, rodes y peduns, a na manira da valuté bele damperfora i proiec stradai y d’infrastrotöres. La Repartiziun Patrimone gnará inciariada da lauré fora a n plann de realisaziun de staziuns da ciarié sö al intern di frabicac provinziai. Le Consorz dl Comun y la Provinzia s’incuntará por ciafé n’acordanza por la sostituziun y la cumpra de veicui eletrics: düc i veicui che gnará cumprá messará tl dagní ester eletrics, da pert dl’aministraziun provinziala, dles scores, dla sanité y di ënc stromentai. Al podará ma gní cumpré veicui nia eletrics sce la dezijiun é basada sön motivaziuns concretes y stersces. La STA se fistidiará dl’ativité de sensibilisaziun y dl’organisaziun de best-practice por chi dla roda. La valutaziun dles mosöres y la publicaziun de düc i indicadus dla mobilité sostenibla sará indere le compit dl Istitut provinzial ASTAT.
USP
