Atualità
Dala Junta: apalc publics, scemplificaziuns y partezipaziun
La Junta provinziala inviëia düc i interessá da fá propostes por criters de sostenibilité ti apalc publics y aprovëia scemplifcaziuns sot ai 40mile euro.
La sostenibilité ti apalc publics ne ó nia ma dí che l’economia é plü efiziënta, sostenibla y competitiva, mo á ince vantaji sön l’economia dl marcé. “Adöm cun i zitadins, les perts interessades, assoziaziuns y ënc é sëgn nosc obietif sciöche Provinzia da stabilí te n dialogh partezipatif diretives nöies por la definiziun y l’aplicaziun de criters de sostenibilité che reverda i apalc publics”, á anunzié le presidënt Arno Kompatscher do la sentada dla Junta. Por podëi definí criters de sostenibilité te na forma concreta pro les prozedöres de gara tl Südtirol él nezesciar che düc i interessá toles pert: chësc é l’invit dl Presidënt a dötes les categories che á da nen fá cun prozedimënc y apalc dla Provinzia. Aladô de chisc criters ne gnarál nia ma tut en conscidraziun l’oferta economicamënter plü a bun prisc, “mo al gnará renforzé faturs sciöche la sostenibilité ambientala y la fujina de produziun regionala”, á ajunté Kompatscher. Cina ai 15 de agost dl 2017 podará düc i ënc y les porsones interessades presenté osservaziuns y propostes söi criters de sostenibilité da inserí tl percurs di apalc. Idees y propostes sön i stromënc d’analisa y sön les carateristiches por tó pert a apalc pó gní menades diretamënter al’Agenzia por i prozedimënc y la verda di contrac publics de laurs, sorvisc y fornidöres (ACP) menan na email a: acp.strategie@provincia.bz.it.
L’ACP metará sö spo n grup de laur tecnich che fajará n’analisa dles propostes, tignin cunt ince sce al é poscibl da les realisé. Porsones y rapresentanc de grups d’interes o de assoziaziuns y uniuns pó presenté domanda da fá pert dl grup cina ai 15 de agost, che gnará nominé spo ince sön la basa de na rapresentanza valia.
Scemplificaziuns pro i aplac sot ai 40 mile euro
Tres por ci che reverda i apalc á la Junta provinziala aprové incö na scemplificaziun pro i laurs cun n import cina ai 40 mile euro. Por chësta sort de apalc, che ne á nia debojëgn de na conzesciun da frabiché o de d’atres autorisaziuns, ne él nia plü preodü la verificaziun dl proiet y la validaziun. Le Südtirol é la sora Provinzia dla Talia che ne á nia debojëgn de n proiet formal por i apalc publics sot ai 40mile euro, spliga l’ACP. “Les diretives d’aplicaziun vëgn valutades tresfora por analisé olache al é poscibl da les mioré por avëi prozedöres asveltes y plü scëmples, olache ara vá da le fá”, stlüj jö Kompatscher.
USP
