Atualità
Integraziun: l'assessur Achammer presentëia les mosöres
L’integraziun é n sorvisc, che se basëia sön la partezipaziun. Ci che l’Aministraziun provinziala s’aspeta y ci che ara pita, á presenté incö l’ass. Achammer.
L’integraziun é n prozes partezipatif che se damana la desponibilité da mëte a desposiziun les capazités personales y da mostré ince motivaziun personala. La Provinzia de Balsan ti mët a desposiziun ai zitadins nüs ofertes che sostëgn n’inclujiun valia tla sozieté, mo ara se damana ince la orenté da s’integré.
L’assessur por l’integraziun Philipp Achammer á presenté incö ai 28 de jügn te na conferënza stampa i pilastri dla politica d’integraziun dla Provinzia. “La condiziun fondamentala por l’integraziun é les conescënzes linguistiches”, á splighé l’assessur recordan che ince la conescënza dles regoles dla sozieté südtiroleja é fondamentala. “Datrai él debojëgn de val’ n pü’ de plü co ma azënc positifs”, á dit Achammer sotlignan che le messaje prinzipal é: “Chi che desmostra da s’impegné, s’arichësc cun valurs implü.”
Dal’acordanza d’integraziun cina ala mudaziun dla lege
L’acordanza d’integraziun é gnüda elaborada cun dötes les assoziaziuns interessades y é spo gnüda aprovada dala Junta provinziala. Ara contëgn l’azes valí sciöche ince poscibilités de partezipaziun te düc i seturs dla vita publica, soziala, culturala y economica por düc i zitadins nüs. Derevers vëgnel ince stabilí che i zitadins nüs é obliá “da tó pert ativamënter al prozes d’integraziun y da anuzé les poscibilités pitades – fondamental é chiló la conescënza di lingac provinziai sciöche ince la cualificaziun profescionala por ti rové pormezt al monn dl laur” (acordanza d’integraziun, plata 8).
Por stabilí le prinzip “integraziun tres prestaziuns” gnarál mudé la lege d’integraziun provinziala a na manira che l’azes ales prestaziuns, che vá sura les prestaziuns de basa fora, gnará coliades ala partezipaziun ales mosöres de sostëgn dl’integraziun, respetan i prinzips de proporzionalité y razionalité. L’assessur Achammer á recordé che la mudaziun legislativa é basada ince sön l’arat dl’Avocatöra dla Provinzia. La mudaziun vëgn metüda ite tla lege omnibus che gnará tratada chësta edema tl Consëi provinzial. Les diretives nöies ne gnará nia aplicades ai zitadins dl’Uniun europeica, deache do la lege varënta mëssel gní garantí le tratamënt anfat de düc i zitadins europeics.
Co vëgn pa l’integraziun sostignida – ci vëgnel pa damané?
Sciöche mosöres d’integraziun á l’assessur Achammer nominé dantadöt cursc de lingaz, d’integraziun y d’orientamënt sciöche ince la conclujiun dl percurs scolastich d’oblianza pro i mituns. La man publica sostëgn l’orenté d’integraziun cun de plü mosöres. Insciö vëgnel finanzié proiec y scomenciadies d’inclujiun di Comuns y dles Comunités raionales. Istituziuns de formaziun sciöche scolines, scores, zentri de lingaz laora por cherié les condiziuns por l’integraziun tres cursc de lingaz da d’isté, proiec tles scores, la metüda a desposiziun de personal didatich y de mediaturs culturai por la consulënza y la formaziun dl personal. Por i muciadus vëgnel pité cursc por talian y todësch debann. La Junta provinziala á aprové inier te süa sentada ressurses implü de 300.000 euro por cursc de todësch.
Zëntri de consulënza por la migraziun é a Balsan, Maran y Bornech: atualmënter él sön le program la daurida de n zënter nü a Solaneres. Na seria de proiec vëgn ince organisá dai Ofizi provinziai por ci che reverda danter l'ater l’elaboraziun de material didatich por les scolines y scores.
Do l’aprovaziun dles mosöres d’integraziun gnará ince definí ci sorvisc che depënn dala contlujiun de prestaziuns ajuntives. Al gnará spo stabilí les diretives d’atuaziun dala Junta provinziala.
“Les mosöres ajuntives reverda prestaziuns che vá sura les prestaziuns de basa fora”, á splighé Achammer. “Por ejëmpl contribuc por la familia y por l’afit.” L’assessur á prezisé che al ne sará nia ma “le capo familia” che podará fá domanda por les prestaziuns d’integraziun, mo che al gnará revaluté le rode dles ëres y dles umes. Denant co che les diretives gnará aprovades dala Junta sarál le Comité d’integraziun provinzial che dará jö so arat. “Al n’esist degöna alternativa al’integraziun. I orun na convivënza pazifica evitan la creaziun de ghettos”, á prezisé Achammer recordan che i sforc da pert di zitadins nüs é indespensabls da orëi ester na pert dla sozieté.
USP
Galaria dales fotografies
Foto: USP/Ingo Dejaco
