Atualità
La naziunlela dl saut dl’ëiles rejona gherdëina
OSP - Cinch sun sies mutans dla nueva scuadra naziunela taliana dl saut ie dl Südtirol, plu avisa de Gherdëina. A Bulsan iel unì presentà la scuadra dl’ëiles cun la presënza dl Presidënt dla Provinzia de Bulsan, dl Assessëur per l turism y dl Assessëur ladin. Dal Assessorat per l turism y cuestions alpines vëniel sustenì la scuadra nueva che purterà l inuem dl Südtirol pra la garejedes nternaziuneles de saut.
La mutans dl saut rapresenterà la Talia pra i campionac dl mond de fauré 2004 tl Norwegen ulache purdà muever per l prim iede nce ufizialmënter l’ëiles. Sciche nazion nueva tla garejedes nternaziuneles de saut à la mutans ntan i ultimi mënsc bele trat l nteres di media y dl’autra nuef nazions che à na scuadra naziunela dl’ëiles. Dantaldut tl Deutschland ie l nteres per l muvimënt nuef dl’ëiiles tla Talia stat garant. L Assessorat per Cuestions Alpines y Turism sustën chësc muvimënt cun l sëni dl Südtirol che purterà l inuem dla provinzia ora per l mont dl saut nordich. L sëni dl Südtirol ie da udëi sun i schi y sun i caschi che ie unic ajeniei per l ucajion. La scuadra naziunela taliana nfati, ie la prima a avëi n casco depënt, per dutes unfat. A man iel uni depënt n panorama da d’inviërn sciche l vën adurvà per l retlam dal’associazion per l marketing dl Südtirol SMG. La scuadra ie metuda adum da Elena Rundaldier, Jenni Perathoner, Barbara Stuffer, Lisa Demetz, Valentine Prucker y Roberta D`Agostina de Tarvisio (Udine). Che ti stà do ala scudra ie l ex-trainer dla naziunela dl’Austria Fabian Ebenhoch y l respunsabl per l saut dl’ëiles tla Talia Romed Moroder de Urtijëi. Dl garn svilup dl muvimënt per l saut dl’ëiles, che à scumencià dan 14 mënsc te Gherdëina, se a fat marueia la bela cumpëida de jënt unida adalerch per la presentazion. Danter chisc l diretëur per l saut talian tla F.I.S.I. Fabio Morandini, che à nce pudù saludé l presidënt dla Provinzia de Bulsan, l assessëur per l turism y l’assessëur ladin. A ti mbincé dut l bon ala mutans iel nce unit adalerch la star taliana dl saut Roberto Cecon y Eva Ganster, ex-record dl mont cun n saut de167metri.OSP
