Atualità
Start dla campagna S.O.S. Zebra nöia, codejel ince por ladin
La campagna de S.O.S. Zebra, che é dedicada ala segurëza stradala di peduns, é rovada a süa diejima ediziun. Logo nü y colaboraziun cun le Trentin.
Ciaré a man dërta, ciaré a man ciampa: y impormó daldô jí dal’atra pert dla strada – Chësc é le slogan dl logo nü dla campagna de sensibilisaziun de S.O.S. Zebra che é rovada inann ala dejima ediziun. La scomenciadia é ponsada por aumenté la segurëza dantadöt tles vijinanzes dles 3.150 strisciores pedonales presëntes söl teritrore provinzial, particolarmënter dlungia les scores. Nia ma i mituns y les mitans, mo ince i seniors é te situaziuns de prigo canche ai se möi sön strada. Chësc svilup, che é en aumënt aladô de stüdi internazionai, á porté le grup de laur de SOS Zebra a elaboré n program de formaziun spezifica por seniors y mituns organisá tl Safety Park y sostigní da UPAC y KVW. Tratan le 2016 él sté indöt 2000 mituns y mitans dles scores elementares y mesanes, 570 dles scolines y 100 seniors che á tut pert a scomenciadies de educaziun stradala.
Le diretur de Departimënt Valentino Pagani á sotligné tratan la conferënza stampa la buna colaboraziun cun le Trentin che é gnüda renovada ince inann. N'atra tematica atocada é ince stada chëra dl aumënt dles straufunghes y dles sentënzes plü rigoroses tl caje de inzidënc cun peduns sön les strisciores pedonales, dantadöt sce chi che vá cun l’auto rovëna sot a efec de droga o de alcol. Le procuradú dla Signoria de Balsan, Andrea Sacchetti, á recordé che ince sce les straufunghes é plü altes él impó important da organisé campagnes de sensibilisaziun che é bunes da fá ponsé do y da scomencé ince discursc tl’opiniun publica.
Adöm cun l’Ökoistitut él implü gnü lauré fora n program dër ampl por scolars y scolares dales scolines cina les scores altes. Insciö vëgnel pité por ejëmpl rodes acompagnades por descurí i prighi sön le percurs de scora, aconsiamënc sön i prighi tles vijinanzes dles scores, mostres temporanees, fujines pratiches por cuncé les rodes y aziuns de acompagnamënt di scolars a ciasa. Na gran importanza á te chësc contest la colaboraziun cun la polizia comunala y les scores. Implü vëgnel ince metü da jí aziuns de promoziun dla mobilité sostenibla, seminars da plü dis y eserzitaziuns pratiches al Safety Park.
Informaziuns dër ütles sön n comportamënt sigü tles vijinanzes de strisciores pedonales contëgn le codejel nü de „S.O.S.Zebra!“, che é desponibl por ladin, talian y todësch. Material d’informaziun ajuntif gnará ince partí fora tles scores dal Ökoistitut y pro les portines de informaziun dl Ofize Renovamënt patent. Le placat nü de SOS Zebra sará da odëi te 54 postaziuns sön les strades prinzipales dl Südtirol y te 30 posć sön les strades prinzipales dla Provinzia de Trënt.
Video presentaziun "SOS Zebra"
USP
Galaria dales fotografies
