Atualità
Dala Junta: Novités dala scora, mobilité y cultura
Peter Höllrigl ne sará dal 1. de ma nia plü l’Intendënt dles scores todësces, ai 17 de setëmber él le De dl’Euregio y le De dles rodes sön la MeBo é gnü sposté
Dal pröm de merz dl 2018 ne sará Peter Höllrigl do da 15 agn de sorvisc nia plü l’Intendënt scolastich dles scores todësces y diretur dla Repartiziun scora y formaziun dla Provinzia. Chësc é gnü comuniché da Höllrigl cun na email menada ai mëmbri dla Junta provinziala dan da püch y che é gnüda dada inant incö ala stampa da pert dl assessur por la scora todëscia Philipp Achammer. Höllrigl á motivé süa dezijiun spligan che “al é süa convinziun che tl monn comples dla scora él nezesciar periodicamënter de n mudamënt tles posiziuns plü altes por de plü rajuns.” L’assessur por la scora Philipp Achammer á dit che al “ti desplej dër tröp deache al é gnü lauré bun adöm. Höllrigl ti á fat fá al sistem scolastich intier de gragn vari inant”. La prozedöra por la nomina dl intendënt nü é regolamentada dal Statut d’Autonomia y da sües normes d’atuaziun. La dezijiun finala gnará tuta dala Junta, do avëi tut en conscidraziun l’arat dl Minister dla Formaziun.
N’atra tematica tratada dala Junta é stada la debatüda sön n De dles rodes sön la MeBo danter Balsan y Maran ai 8 d’otober. “L’idea da festejé i 200 agn dla roda é dessigü dër positiva – á comenté le presidënt Arno Kompatscher – sciöche ince d’atres scomenciadies de sostëgn dla roda sciöche forma de mobilité sostenibla.” Aladô dl arat dla Junta ne é i 8 d’otober nia n bun termin por stlü la MeBo 7 ores y al foss insciö da inrescí n’atra data. “Al se trata de na data tratan chëra che al é preodü n gran trafich de turisć y ince i paurs á tröp da laur te chi dis porvia dla racoiüda dla üa. Porchël él gnü tut la dezijiun da ti damané al grup de laur da elaboré fora na proposta alternativa”, insciö Kompatscher.
Musiga, gastronomia, sport: chisc sará i temesc prinzipai dla Festa dl’Euregio che vëgn organisada en domënia ai 17 de setëmber dales 10.30 inant a Pergine tl Trentin. “Al se trata dla poscibilité da ti presenté ala popolaziun les carateristiches tradizionales di trëi teritori dl’Euregio, da lascé odëi ince i lians danter i raiuns y i bugn resultac arjunc dal’Euregio”, á splighé le presidënt da Provinzia Arno Kompatscher incö ai 12 de setëmber. “Trëi teritori, öna na festa”, chësc é le slogan dla scomenciadia che gnará inaudada dales 11 dai trëi presidënc di teritori dl’Euregio, Arno Kompatscher, Günther Platter y Ugo Rossi. La festa é l’apuntamënt conclusif dla presidënza trentina dl’Euregio che passará cun le mëis d’otober al Südtirol. Pergine podará gní arjunta ma cun mesi privac, mo ince cun la ferata dl’Euregio che gnará metüda a desposiziun debann por düc i interessá. La ferata piará ia dales 6.22 da Desproch cun architades a Balsan y Trënt cun la poscibilité da jí ince zoruch. Por de plü informaziuns, ince sön le program, y por les prenotaziuns él poscibl da contaté l’Ofize deboriada dl’Euregio (0471402026 - info@europaregion.info).
USP
