Atualità
Mobilité, proiec por Bornech y Puster
Proiec che reverda la ferata, la varianta dl Riggertal, le zënter de mobilité: 200 porsones á tut pert ala incuntada publica cun Kompatscher y Mussner.
Passé dal auto ala scina, sparagné insciö tëmp y scioldi y mioré la cualité dla vita. Tratan la sëra d'informaziun inviada ia ai 13 de setëmber a Bornech él gnü rajoné dla ferata sciöche alternativa concreta al auto privat. Presciapüch 200 porsones á tut pert al'incuntada olache al ê ince presënc le presidënt dla Provinzia Arno Kompatscher, l'assessur Florian Mussner, sciöche ince l'ombolt da Bornech y presidënt dla Comunité comprensoriala Roland Griessmair, le presidënt dles strotöres de trasport dl Südtirol (STA/AG) Martin Ausserdorfer y le diretur dla Repartiziun Mobilité Günther Burger. "I un l'inciaria da cherié les infrastrotöres por la mobilité dl dagní deboriada cun la popolaziun ciaran da ciafé de bones soluziuns por l'ambiënt, la sanité, l'economia y la cualité dla vita" á alzé fora le presidënt Kompatscher. Por ci che reverda la trafich se tratera dantadöt da ti dé importanza ales zirconvalaziuns, mo ara nen vá ince da ciaré da fá a na manira che tres de plü porsones toles la ferata, che é le meso de trasport dl dagní, impede tó l'auto. "I orun fá a na moda che al sides na ferata vigni mesora por döt le Südtirol y vigni cherdora ti orars zentrai y sön les trasses prinzipales. Por arjunje chësc él da investí ti gragn proiec de mobilité sciöche tl'eletrificaziun dla ferata dla Val Venosta, tl tunel dl Virgl, tl potenziamënt dla linia dla ferata Maran-Balsan y tla varianta dl Riggertal por Puster" á splighé le presidënt dla Provinzia. Nia da se desmentié n'él sambëgn dl tunel de basa dl Prener che gnará stlüt jö dl 2026.
10 miliuns de passajiers dl 2017
L'assessur por la mobilité se tol a dí che ince la popolaziun mëss dé so contribut y ciaré da se sposté cun mesi plü ecologics. Na bona alternativa é zënzater la ferata che á bele arjunt dër de bogn standarg de cualité por ci che reverda la puntualité y tröpes staziuns dla ferata é ince gnüdes modernisades: al é gnü realisé plazes da lascé jö l'auto y mioré le coliamënt cun i busc. "Sce dl 2012 án podü cumpedé 6,2 miliuns de passajiers, nen él sëgn gnü registré bëgn 10 miliuns, le plü é chersciü le numer te Puster" á recordé l'assessur Mussner. La situaziun gnará ciamó miorada dai proiec sciöche la varianta dl Riggertal, la realisaziun de staziuns dla ferata nöies, sciöche a Vahrn y Schabs, y le tunel de basa dl Prener. Günther Burger, diretur dla repartiziun Mobilité, á impormetü che tl dagní piarál ia da Bornech na ferata vigni mesora tla direziun de Balsan y Sterzing y ara adorará ince 15 menüc demanco. "Chësc oress dí che n pendolar che fej presciapüch 220 iadi al ann, davagnass 110 ores de so tëmp lëde", á splighé Burger. Le presidënt y le diretur de STA/AG Martin Ausserdorfer y Joachim Dejaco á dit che Bornech ciafará ti proscimi agn n zënter de mobilité cun standarg de cualité dër alc y gnará n punt d'incrujada strategich por döt le trasport publich.
Varianta dl Riggertal
Cun la varianta dl Riggertal de 3,5 km, che coliará Schabs y la linia dl Prener cun chëla de Puster zënza messëi mudé ferata a Franzensfeste, gnarál potenzié la ferata te döt chësc raiun sparagnon 15 menüc. An mina che al s'alzes le numer di passajiers a 750.000 porsones. Le pröm toch dla varianta dl Riggertal jará paralelamënter al'autostrada dl Prener y rovará spo te n tunel de 850 metri cina al punt dla strada de Puster. Da chiló inant jará la varianta a per dla strada statala cina pro l'incrujada Natz-Schabs, olache al gnará realisé na staziun nöia. L'ultimo toch jará inant sot tera cina pro la linia dla ferata che coliëia Franzensfeste cun Sanciana. Le proiet dess gní stlüt jö por le 2024.
Zënter de mobilité de Bornech
La proietaziun y la realisaziun dl zënter de mobilité de Bornech da pert dla Provinzia, dl Comun y de STA/AG é un di proiec plü importanc por la mobilité. Döt l'areal dla ferata che tol ite na spersa de 22.000 metri cuadrac gnará organisé danü y gnará trasformé te n punt d'incrujada important por le trafich, nia ma sön scines. Al é indöt 16 linies de bus che röia dailó danter citybus, nightliner y bus extraurbans. Tl dagní sarál ince plü saurí y scëmpl da sfruté i coliamënc cun i atri mesi ince por mirit dl terminal dl bus cun 10 raiuns de architada. Al gnará ince fat sö plazes da lascé jö l'auto y la roda, posć por le car-sharing y sperses vërdes. Ince le frabicat dla staziun gnará resané.
USP
Galaria dales fotografies
