Atualità
La populazion de Pruca tira inò l flà
OSP - La cualità de vita per la jënt de Pruca ie da ncuei ino mieura. Cun la giaurida ai auti dl tunel nuef da pert dl Presidënt dla Provinzia y dl Assessëur ai Lëures Publics vën l luech de Pruca taià ora dala fuera, dal mpanziamët dl’aria y dal pericul sun streda gaujà dal muvimënt di auti che furnea te Gherdëina. Ncuei danmesdi, ai 22 de utober ie l tunel nuef unì mplenì da na gran cumpëida de jënt che à festejà la giaurida tan aspiteda, dan lascé passé i prim auti. Da mesdì an bele pudù furné tres l tunel nuef de 420 metri che à custà ntëur a sies milion de Euro.
L ne ie nia giut cà che la codes de auti fova fërmes tres l zënter de Pruca y che i nieves de chëi dai auti univa muserei dala stanges per fé passé la ferata. Ncuei ie dut chësc belau desmicià à dit l ambolt de Pruca Norbert Merler pra la giaurida dl tunel. L prim zitadin de Pruca à rengrazià duc chëi che a laurà per la zircunvalazion dl luech, dantaldut i rapresentanc dla Provinzia de Bulsan. L luech se à bele chietà da canche l fova dan Nadel unì giaurì l puent sëura l Isarch, l cunliamënt per la streda de Ciastel y l curi prò dla trassa dla ferata tes l zënter. La cualità de vita a Pruca ie miureda. Cun la giaurida dl tunel per l ntreda te Gherdëina do 250 dis de lëur, ie la majera pert dl proiet de zircunvalazion de Pruca finà. Na lauda ti à l Assessëur ai Lëures Publics fat ala firma PAC y si culaburatëurs, che à fat n bon lëur tenian ite i tëmpes. A dëi ti al dat na S.Barbara de lën, patrona de chëi che fora tl crëp. N cont de custimënc, al dit, che n ie restei tla soma ududa danora. Nchina mo iel unì frabicà per 17,8 milion de Euro. Cun i mëndri lëures che mancia mo per finé via ne jiran nia sëura 19,5 milion de Euro udui danora. Chësc tunel ie unì fat per chëi de Pruca à dit l Presidënt dla Provinzia, ma l dëssa sambën vester de utl per duc chëi che passa a furné te Gherdëina. Cun chësc gran proiet che tol ite l puent (65 metri), l tunel artifiziel per la ferata (396 metri), l puent de cunliamënt per la streda de Ciastel cun l gran mur de sustëni, l cunliamënt nuef per l zënter de Pruca, l rondel y l tunel iel unì fat velch per l daunì y nce per l ambiënt àl dit inat. Per l unì a se l dé de chësc majer lëur iel nce stat de bujën dla bona culaburazion cun l Chemun de Pruca. Per d’autri problemes cun l trasport de persones y l trasport pesoch cialerà la Provinzia de miuré inant la situazion de Pruca. Nce per l tunel dl Brener se mëten da pert dla jënt, se mpenian per la miëura soluzion, iel unì dit. Per la giaurida cun beniediscion tres l pluan Alois Seeber ie unit adalerch truepa jënt dai luesc nteressei, danter chisc nce i sculeies y la Mujiga de Pruca, y i aministradëures di Chemuns unjins. Chisc dis iel nce unì metù ju asfalt da nuef sun i ultimi chilometri dan ruvé ora pra tunel, ntant che sun la streda da Tluses ite veniel metù su la lumes per luminé nce l ultimo tunel.OSP
