Atualità
Brüssel ne va nia contra la marca „Südtirol“
OSP – L Südtirol se bat tres pra la cumiscion dl EU. La direzion di marceies nteranziunei ne jirà nia contra la marca „Südtirol“. Bele plu mënsc iel unì pustejà cun i nciariei dl’EU, ncuei juebia ai 23 à l Assessëur per l’Economia giapà la parola dl diretëur dla cumiscion europea per i marceies nternaziunei Guido Berardis. La marca „Südtirol“ pudrà nsci nce unida adurveda tl daunì.
L ie n mumënt mpurtant per Südtirol y si prodoc de cualtà: sun i prodoc de nosta provinzia possel inant unì scit su „Südtirol“ spiega l Assessëur per l’Economia. L’autorità europea ova per via de na plura cialà do la conformità dla marca „Südtirol“ cun l’urdinanza EU 2081/1992. L Südtirol resiova l prozedimënt. Contra chësc se à la Provinzia de Bulsan parà cun forza. L Assessëur per l marketing cun si diretëur de ripartizion Florian Zerzer y l coordinadëur dl ufize destacà a Brüssel Claudio Quaranta fova prësenc pra l’ancunteda a Brüssel. L Südtirol ie te na posizion speziela, nsci l assessëur pra l ancuteda. Per drët à l Südtirol na marca de parola y desseni che vën bele dal 1977 straverdeda sciche patent de marca coletiva dal dërt per marches talian. L’argumentazion che la cuestion ne ie nia de cuntrolé aldò dl’urdinaza EU, ma do l dët per marches ie unì udù de bon uëdl dal diretëur Berardis. La marca de cualità „Südtirol“ possa nsci unida adurveda inat per i prodoc de cualità sciche i mëiles, l lat y i prodoc dl lat, l ciociul, l pan, la snops, la miel, la verdura y l soft de mëiles. Chësc suzes ie la cundizon acioche la marca „Südtirol“ posse unida slargeda ora a na marca per duta la Provinza de Bulsan.OSP
