Atualità
L’autorisazion per nsenië jù lerneri
OSP – Chi che uel nsenië jù lerneri tl Südtirol, adrova nce tl daunì l’autorisazion. Nsci vëniel fat al savëi dal Assessorat per l nsenieamënt di lerneri y per la furmazion di mostri.
Ncuei, ai 24 de utober va ndrova la reforma dl marcià dl lëur sun duta la Talia che vëija nce dant la normatives per i lerneri. Melsegurezes ie unides a lum sun la cunseguenzes che la reforma purterà cun sé. L Assessëur spezifichea che la normatives nueves ne jirà nia ndrova bele riesc tlo da nëus, ajache tla Provinzia de Bulsan iel na lege che regulamentea la cuestion. Cun d’autra paroles sinifichea chësc che l sistem cun l’autorisazion per nsenië lerneri resta inatn ndrova. Per ti nsenië a jëuni y ala jëunes n mestier iel debujën de chësta autorisazion. Nfurmazions plu avisa iel da giapé dal Ufize provinziel per l Nseniamënt Profesciunel, al numer de telefonn 0471-41 36 20. La reforma naziuela vëija dant trëi sortes de cuntrac cun lerneri. La ripartizion per la furmazion de lerneri y mostri, y l ufize provinziel cumpetënt cëla sën do plu avisa a ce maniera che la riforma naziunela possa unida nterpreteda a livel provinziel. L ie tler che n ne uël nia se lascé smëndrì la cumpetënza legislativa. Tl Assessorat per l’Economia iesen dla minonga che tl Südtirol iel ti ani passei unì laurà ora n sistem ampl per la furmazion a doi pertes che possa for mo unì laurà ora deberiëda cun i partner soziei.OSP
