Atualità
Cuntribuc ala uties da Mont
OSP – 12 uties da mont giapa cuntribuc dala Provinzia de Bulsan per lëures de miuramënt y ngrandimënt de si locai. Sun nteressamët dl assessëur per cuestions alpines Werner Frick, à l Guviern Provinziel dat prò cuntribuc de ndut 450.000 Euro a cater uties da mont privates y a ot uties da mont dl CAI, l Club Alpino Italiano.
Cun i scioldi dëssel unì curì duc i lëures per l mantenimënt y l ngrandimënt cualitatif de locai y dl servisc pità tla uties da mont. N servisc che ne vën nia me pità a chëi da tlo, ma nce ai turisc’ che vën a se goder l tëmp liede. La uties da mont ne pieta nia me scunanza danter la montes, ma cuporta nce na pert mpurtanta dla nfrastrutures turistiches tl Südtirol. La uties vën crides su gën da la jënt che ie tlo a fé feries, dij Frick. Per chësta rejon se tratla de mantenì bën la uties da mont y sambën nce i troies. N ne dëssa nia lascé sun na pert, nsci Frick, l aspet de segurëza dla uties. La Provinzia sustën nce perchël i proiec de mantenì y miuré la uties da mont. „Cun i troies seniei bën y la uties njeniedes sciche toca cun la funzion de pont de riferimënt per chëi che va da mont sù, ne judons dessegur nia prò puech ala segurëza tla montes“ dij l assessëur Werner Frick, nciarà per cuestions Alpines tl Südtirol.OSP
