Atualità
Arsen tl’ega da bever – cunvëni ai 14 de nuvëmber
OSP – Sun l arsen tl’ega da bever, i valores dla normativa nueva che va ndrova ai 25 de dezëmber y la scuviertes scentifiches te cuestions de sanità y tratamënt dl’ega se traterala ai 14 de nuvëmber pra n cunvëni dla Ripartizion Provinziela per la sanità, ega y ernergia.
Arsen ie sun dut l mont n tuësse che n abina drët suvënz tl’ega de sofonz. Me datrai ie chësc gaujà dala persona schiche per ejëmpl canche l vën giavà do minerel de mitel o che l vën adurvà pestizides. Tla majera pert di caji ie l arsen da abinè tl sotiera per rejons natureles y vën deslià ti sedimënc da ega y ruva a chësta maniera tl’ega de sofonz. Te de plu calons dal’ega dl Südtirol iel unì abinà valores de arsen plu auc de no chëi azetei dala organisazion mondiela per la sanità WHO. Chisc valores de 10 microgramm per liter unirà dal 25 de dezëmber 2003 nce de ublianza tla Talia aldò dl decret Nr. 31/01. Per chësta rejon mët la Ripartizion Provinziela per la sanità, ega y ernergia a ji n cunvëni dal titul „arsen tl’ega da bever“. Dantaldut ulëssen nfurmé y istruì ambolc, dutores, dutores dal bestiam, apotecri, ispetëures per l’igena y l ambiënt, respunsabli per l mantenimënt, tratamënt y analisa dl’eghes, y la populazion nteresseda de raions cun truep arsen. Duc chisc dëssa te mez n di de manifestazion unì nfurmei sun la normatives y la scuviertes scentifiches. L cunvëni vën tenì n vënderdi ai 14 de nuvëber 2003 dala 8.45 ala 13.30 tla sala Hypo-Tirol tla sënta dl LVH, streda Mitteweg ti Plans de Bulsan. Do la paroles de salut di urganisadëures, assessëur Otto Saurer y Michl Laimer pudran audì velch da Nicola Sarti dl ministèr per la sanità. L rujenerà nce Ilse Jenewein dl’università de Dispruch, Massimo Ottaviani dl labor per igena ambientela de Roma, Astrid Sapelza dl Ufize Provinziel per l’ega de sofonz, Giulio Morteani tla TU de Minca. La moderazion unirà cureda dala dirighënta dl Mates per igena publica y sanità Giulia Morosetti. N possa se nunziè per scrit tl Ufize per per l’ega de sofonz, streda Cesare-Battisti 23 a Bulsan, tel. 0471-414580, fax 0471-414579, e-mail Gewässernutzung@provincia.bz.itOSP
