Atualità
Nfurmazions sun l servisc zevil tl internet
OSP – Sibe per l servisc zevil de ublianza che nce per l servisc zevil ulenter possen da sën se nfurmé tres la nueva plates tl internet. L Ufize per l servisc zevil a njenià sota www.provinz.bz.it/zivildienst la nfurmazions de utl, i formulares y la lista dla istituzions. Chësta nfurmazions ie nce da liejer do tla rujeneda ladina.
Jëuni che muessa ji a fé l servisc da militer, possa mpede fé l saudé, nce fé l servisc zevil de diesc mënsc. I servijes zevii vën nce adurvei da istituzions publiches y privates tl ciamp soziel, culuturel, sanitèr y de ambiënt. Per chësta urganisazions ie l aiut y la culaburazion de chëi che fej l servisc zevil de gran mpurtanza. Sun la nueva plates tl internet www.provinz.bz.it/zivildienst iel da abiné la nfurmazions che va dala musterung y l sburdlé per rejons de studi nchin ala dumades per pudëi fé l servisc zevil. Nplu vëniel nce dat resposta a cuestions che ie suvënz nia tleres. Da abiné iel pona nce na lista de adresses de istiuzions che sustën l servisc zevil. Tres n link ruven pra tesc de lege y normatives che regulamentea l servisc zevil de ublianza. De merz dl 2001 iel ora dl servisc zevil de ublianza nce unì scumencià cun l servisc zevil ulenter. Nchin che l ne vën nia tëut ju l servisc da saudé, possa ulenteres che ne ie nia passei ala musterung y ëiles dai 18 ai 26 ani fé chësta sort de servisc zevil ulenter. Tl Parlamënt a Roma vëniel iust ntan chisc dis rujenà de lascé pro a duc de fé chësc servisc dal 31 de dezëmber 2004 inant. Coche la ie sën, possa pernan che l servisc da saudé ne ie nia plu n drova, duc i jëuni dai 18 ai 26 ani fé l servisc zevil ulenter. Per dumandes y nfurmazions possen tò su cuntat cun l Ufize Provinziel per l Servisc Zevil, tla Cësa dla Provinzia 1, streda Crispi 3, numer de telefonn 0471-412036 o tres la e-mail Mpacher@serviziocivile.it L adres ladina ie http://www.provinz.bz.it/praesidium/0101/zivildienst/index_l.aspOSP
