Atualità
Doi proiec te Sëlva giapa l bensté
OSP – A passa 20 proiec ti iel unì cialà tl’ultima senteda dla cumiscion per l mpat ambientel. Danter chisc nen fovel nce doi tl Chemun de Sëlva, un sun Daunëi y l’auter per l purtoi dai schi „Cir“.
Dal raion che manacia de smuié sun Daunëi, tl Chemun de Sëlva, dëssl unì avisà demez l’ega. La roies, aghiei y la roles dal’egha dëssa unides metudes a forma de stëila. L’egha unirà pona abineda adum te trumbons y aviseda tres n microtunel de 128 metri de lunghëza nchin al ruf daujin. Cun la valutazion positiva sun l mpat ambientel puderan nce fé i lëures per l mplant da fé nëif sun l’ultima pert dl purtoi Cir che mëina te Val. I diretëures à dat prò de ngrandì l mplant da fé nëif che iel bele per ruvé jù nchin al purtoi da podejé. L mplant ngrandì dajerà la puscibltà de fé nëif sun na lerch de 0,75 hectar de purtoi dai schi y 0,6 hectar de purtoi da podejé. Per chësc lëur saral debujën de mëter jù calons dal’egha per na lunghëza de 350 metri.OSP
