Atualità

Aministraziun | 11.11.2003 | 08:32

Dala senteda dl Guviern Proviziel

USP – Te si ultima senteda à l Guviern Provinziel tratà 120 ponc al orden dl di. Danter chisc nce la regulamentazion per la streda sun Mont de Sëuc, l tunel dl Prëner y la cumposizion dl Guviern Provinziel nuef.

L GUVIERN PROVINZIEL NUEF

Te trëi enes dëssl’a vester tan inant per Guviern Provinzeil nuef. La decijions definitives unirà tëutes ntan la proscima doi enes à dit l presidënt Luis Durnwalder do la senteda dl lunesc. Te chësta ucajion al nfurmà i assessëures co che ie jites l’ancuntedes cun i rapresentanc di partic litei tl Cunsëi Provinziel nuef y coche l miena de ji inant. L idea ie chëla de ji inant cun i medemi partner de coalizion che fova nchin sën, la tratatives de coalizion unirà bele scumencedes ntan i proscimi dis. L Cunsëi Provinziel nuef unirà cherda ite ai 18 de nuvëmber per si prima senteda. Nchin a ntlëuta dëssel nce bele vester tler chiche deventerà presidënt y vizepresidënt. L Presidënt dla Provinzia à nce rujenà de na presidënzia provisoria dl Cunsëi, curida da na persona che fossa pona inò despostà a de jù la ncëria.

TUNEL DL PRËNER

L Guviern Provinziel se prova dassënn per na partezipazion al gran proiet dl Tunel dl Prëner. Per chësta rejon ie l Guviern de chëla che l proiet dëssa unì purtà inat da de nueva Sozieteies de chëles che fej nce pert i Guvierns dla Provinzies nteressedes, sciche l fossa l cajo cun la sozietà dl’ Autostreda dl Prëner S.p.a. Sën iel unì fat ora de nciarè esperc che dëssa lauré ora prupostes che vëija dant formes de cooperazion.

MONT DE SËUC

„Da dezëmber inant dëssel unì metù man cun na regulamentazion che coordineia y smëndrësc l muvimënt sun la streda“ nsci iel unì dit dal Presidënt Durnwalder sun la posizion dla Jonta Provinziela per via dl muvimënt di auti sun Mont de Sëuc. Dala Provinzia fovel unì contribuì cun cin milion de Euro a fé la furnadoia nueva da Sëuc sù. Chësc finanziamënt ie unì pensà sciche cuntribut ala scunanza dl ambient, smendran l muvimënt a motor sun la streda. Cun la giaurida dla furnadoia nueva fovel unì sburdlà l dsaré dla streda ala sajon da inviern. Sën iela tan inant da cuncretisé chël che l fova unì udù dant, nsci l Presidënt. Dan to na decijion definitiva ulëssen mo ti cialé plu avisa ala prutestes dl Chemun da Ciastel.

USP