Atualità
Cunvëni sun la prevenzion de viulënza ai 12 de nuvëmber
USP – Ala dumanda co che n possa schivé azions de viulënza uniral dat resposta ai 12 de nuvëmber pra n cunvëni a Burnech. Te chësta ucajion uniral dat n majer pëis al cunliamënt danter viulënza y raporc. Ala manifestazion nvieia la Ntendënza ala Scola Tudëscia, i Sevijes soziei dal Comunità raionela de Puster, l Servisc per malaties de dependënza, l zënter culturel y di jëuni UFO y la Cësa-INSO de San Laurënz. Diretëures, maestres dla scolina, nsenianc, culaburadëures di Sevijes soziei y saniteres, ma sambën nce chëi che lëura cun jëuni y assessëures ai jëuni ie nviëi.
Viulënza se mostra uni di te d’autra formes: te viulënza a usc, viulënza fisica, viulënza sessuela, da vandalism nchin ala formes de viera sun truepa pertes dl mond. Chëi che fajrà pea l cunvëni se dajrà ju cun situazions de viulënza y de cunëscer y capì la dinamica dla escalazion. L unirà nce rujenà dla pusciblteies de ntervenzion canche l ie unit a se l dé azions de viulënza. La se traterà nce de manieres de prevenzion dla viulënza tla situazions defrëntes. Tres scenes purtedes dant da na grupa dl zënter per Pedgogia dl Teater de Persenon, uniral analisà situazions de viulënza y mparà a cunëscer la pusciblteies de descalazion, de ntervenzion y nce de prevenzion. Referënt ie l pedagogh soziel, psychotherapeut, supervisor y espert de furmazion di granc Karl Auer (Dispruch); la psicologa, psychotherapeuta y cunsulënta de genitores Christine Baumgartner (Burnech); l psychologh, psychotherapeut per mutons, jëuni y granc Martin Christandl (Dispruch); la psychologa, psychotherapeuta y consulënta de scola Anna Elisabeth Ebensperger (Bulsan), dl psychoterapeut, supervisor y consulënt per svilup de urganisazion Jodok Moosbrugger (Dispruch); la pedagoga y consulënta de scola Karin Pernstich (Eppan) y l perdagogh y dirighënt dl zënter de teater Thomas Troi (Persenon). L cunvëni scumëncia n mierculdi ai 12 de nuvëmber 2003 dala 8.30 tla aula dl ginase humanistich a Burnech y jirà inant nchin dala cinch domesdi.USP
