Atualità
Aministradëura nueva dla Lia di mëinacrëp y mëinaschi da Frick
USP- Annegret Vescoli ie l’aministradëura nueva dla Lia di mëinacrëp y mëinaschi dl Südtirol. Deberieda cun l presidënt Othmar Prinoth se ala ancuntà cun l assessëur per l alpinism Werner Frick, l diretëur de ufize Hansi Felder y l diretëur de ripartizion Florian Zerzer.
Pra l’ancunteda iel dantaldut unì rujenà dla culaburazion danter l Ufize per l alpinism y la Lia di mëinacrëp y mëinaschi dl Südtirol. Gran pëis ti iel unì dalt ala furmazion y si mpurtanza zëntrela per duc i presënc. N à udù de bon uëdl che la Lia Provinziela ne à nia problemes de jëuni che vën do davia che ntan i ultimi ani iel for ruvà leprò de nuef cumëmbri. Schiche „drët bona“ à l presidënt Othmar Prinoth valutà l bilanz dla sajon da d’instà. Per via dl truep bel tëmp ie l instà jit dastramp bën. Ma te chisc mënsc an nce udù che l gran ciaut se damanda plu mpëni per i pruvediënc de segurëza y per nfurmé chëi che va su per i dlacieres. Hansi Felder à purtà dant l’azion sun la segurëza tla scoles mesanes y autes de rujeneda ladina y tudësca. Pra chësta azion, che vën fata deberieda, iel mëinacrëp che dà cunsëies ai sculeies sun l ji da mont sù y l ji a crëp. De gran mpurtanza nsci Hansi Felder, ie che pra chësta azion va i meinacrëp tla scoles per respuender ala dumandes di sculeies ntan l tëmp de scola. L’azion à da permò metù man y dëssa ji inant ntan dut l inviërn.Usp
