Atualità
Durnwalder anconta rapresentanc ladins
Usp- Rapresentanc dla valedes ladines cun l assessëur Florian Mussner se à ncuei ancuntà cun l Presidënt dla Provinzia Durnwalder. Da pert di rapresentanc ladins iel unì purtà dant cie che n se mbincia per la proscima legislatura, danterauter iel unì damandà che l assessëur Mussner giape nce te cunsëi regiunel n assessorat sciche rapresentant ladin.
Florian Mussner dëssa inant resté Assessëur ai lëures pubblics, se à damanda i ambolc y i rapresentanc de Gherdëina y dla Val Badia ncuei da Durnwalder. Mplù dëssl nce giapé lerch tla Jonta Regiunela sciche rapresentant ladin. Deberieda cun Durnwalder iel nce unì rujenà de la mënter tosc a ji che n ladin posse nce deventé Vizepresidënt dl Guviern Provinziel. I rapresentanc dla valedes ladines à purtà dant la situazion dla doi valedes. Te chësta ucajion an rujenà di problemes di muvimënt sun streda, dla cultura, scola y dl’ambient. Per pudëi ti ji permez a chisc y nce a d’autri problemes se mbincen almanca doi ancuntedes al ann cun l Presidënt dla Provinzia y l Assessëur Ladin. L Presidënt Durnwalder à mpermetù de ulëi fé chësta ancuntedes.Usp
