Atualità
La streda sun Mont Sëuc vën zareda
Usp – La regulamentazion per la streda sun Mont de Sëuc che jirà ndrova ai 20 de dezëmber y l plann di purtoies ie stai i argumënc plu mpurtanc che ie unii tratei tl’ultima senteda dla Jonta Provinziela. A Picolin ne uiral nia plu jit inant cun la Scola Profesciunela.
Do plu tratatives iel sën sgur, la stredea sun Mont de Sëuc vën dsareda via per l di y chësc dai 20 de dezëmber inant. La decijion dla Jonta Provinziela vel n iede provisoriamënter per n ann y pona possel unì fat adatamënc. Al’autëza de St. Valentin uniral metù na stangia che dsera la streda d’inviern dala 9.30 ala 15.00 y d’instà dala 9.30 ala 16.00. Da duman, dan l orar udù dant, possen furné sun Mont Sëuc nchin che la 700 lueges dai auti, dal Spitzbühl, Kompatsch y Bulacia ie liedeis y l semafer mostra vërt. Ntan l orar canche la streda ie dsareda possa me sù chëi che à na lizënza ajache i vif, lëura o ie de cuatier sun Mont Sëuc, iel unì spiegà dal Presidënt Durnwalder. Ntan l orar possa furné sù nchin a cater curieres. Dl servisc dla curieres se cruzia l Chemun da Ciastel che ne giapa degun cuntribuc dala Provinzia per chësc. Chëi che ie bele sun Mont Sëuc cun l auto possa furné jù da uni ëura. La curiera dal Kompatsch che mëina ite dal Ritsch y Sautaria furnerà inant y nsci possen arjonjer saurì la ustaries te chisc raions. Tl raion dl Scilier uniral metù a ji n shuttle-service che mëina debant nchin ala furnadoia nueva, chësc bus vën sustenì dala Provinzia. Per evité che l sibe truep da aspité a unì da mont jù cun la furnadoia, possel unì lascià jì la furnadoia plu debota y tacan ite de plu cabines auzà la capazità de trasport da 2.400 a 4.000 persones al’ëura, à dit l Presidënt dla Jonta. Dan to na decijion à la Jonta mo cialà tres la protestes mandedes ite dal Chemun da Ciastel. La furnadoia nueva da Sëuc nchin sun Mont de Sëuc, che ie unida finanzieda cun cin milioin de Euro dala Provinzia, fova unida giaurida ai 15 de agost 2003. I scioldi ie unì destinei sciche n cuntribut per l ambiënt, iel unì lecurdà da Durnwalder. La furnadoia dëssa ti to l muvimënt a motor ala Mont de Sëuc y mustré che n à fat n bon investimënt.Deguna mudazion al plann di purtoies
Dan trëi ani ova la Jonta Provinziela dat pro l plann di purtoies per i proscimi 10 ani. Do i prim trëi ani possel unì fat i prim adatamënc che ie sën uni dai pro dala Jonta Provinziela. I chemuns ova de fauré dat ju la dumandes per slungé o slargé vel purtoies, o ulache l ie debujën de fé mo vel auti culegamënc. L Presidënt Durnwalder à dit che de pitla mudazions techniches schiche pra i purtoies, per la segurëza y per aumenté la capazità de trasport à tosc giapà l bënsté. Tlo fovel unì da ite 38 dumandes. De majeri proiec sciche l fé purtoies y mplanc nueves muessa unì cialei do plu avisa. Per la fin dl ann o de jenè dëssa nce chisc unì tratei dala Jonta Provinziela.
Deguna scola profesciunela a Picolin
La scola profesciunela per turism y gastronomia de Burnech cun la sëntes destachedes a Picolin, Sand in Taufers y Welsberg avra aldò dla delibera dla Jonta Provinziela, per n auter ann me plu la sënta prinzipiela a Burnech. Tla sëntes destachedes a Picolin y Sand in Taufers ne iel nia sculeies assé. Per la Scola Profesciunela de Burnech vëniel tëut locai n afit per i proscimi cin ani. Pona dëssa la scola trapiné a Dietenheim.
USP
