Atualità
Sotscrizions per mëndri y jëuni dates ju da Durnwalder
USP – I rapresentanc dl Jungendring y dla Jungschar dl Südtirol se à ncuei danmesdi, ai 21 de nuvëmber, ancuntà cun l Presidënt dla Provinzia Luis Durnwalder tla Cësa dla Provinzia Widmann a Bulsan. Te chësta ucajion iel unì rujenà sun de plu argumënc che ti sta a cuer ai jëuni. La 6.000 sotscrizions che se damanda n aucat per straverdé i mëndri y i jëuni ie ncuei unides sëurandates al Presidënt dla Provinzia. Durnwalder à dit de ulëi tenì cont dla pruposta ntan chësta legislatura.
La discuscion tla sënta dl Presidënt dla Provinzia ie unida meneda sun problemes di jëuni tl Südtirol y dl daunì dl lëur cun i jëuni te nosta provinzia. La Jungschar ti à sëurandat a Durnwalder la lista cun 6.000 sotscrizions che ie unides abinedes adum ntan chisc dis. Cun chësta sotscrizions se damnaden che l vënie njenià n ufize per n aucat di jëuni che ti posse vester de aiut a mëndri y jëuni de dut l Südtirol. L Presidënt Durnwalder à mustrà cumprenscion per i bujëns di jëuni y à dit de ulëi se cruzié che chësc argumënt vënie tratà dala Jonta Provinziela. Ël à detlarà de ulëi purté inant la cuestion y de cialé che la urganisazions cumpetëntes se mpënie de chësc viers. „La ntenzion ie chëla de anjenié ca la ntroduzion de n aucat per la jëunanza cun la Jonta nueva y pona de fé na lege tl ann 2005“ à dit Durnwalder. L aucat per la jëunanza dëssa ti judé ai jëuni te problemes de dërt y tl soziel, lauran nce deberieda cun i servijes publics y privac per i jëuni. Durnwalder cun i rapresentanc dl Jugendring y dla Jungschar (Foto LPA/Pertl)USP
