Atualità
Sponsorisazion per la Copa dl Mond te Gherdëina y Badia
Usp – La Provinzia sponsoriseia la trëi garejedes de Copa dl Mond te Gherdëina y tla Val Badia dai 19 ai 21 de dezëmber cun ca. 150.000 Euro. La Jonta Provinziela à da permò dat pró la cunvenzion de retlam presenteda sun pruposta dl assessëur Werner Frick. Pra la garejedes fajerà la Provinzia retlam per l Südtirol.
„Justa la gran cumpëida de jënt che ti cëla ala garejedes n direta tres televijion ie na garanzia per l retlam a nosta Provinzia y a nosc prodoc“, nsci l assessëur Frick. Tres i cuntrac de sponsorisazion se presenterà l Assessorat per Artejanat, cumerz y turism sciche sponsor pra la doi garejedes sun l purtoi „Saslong“ te Gherdëina y pra l slalom lerch sun la Gran Risa tl Alta Badia. L inuem „Südtirol“ unirà ntegrà ti logos „Gröden-Südtirol“ y „Alta Badia-Südtirol“ y sarà da udëi sun i numri di atlec per la proves y per la garejedes. Sibe pra la cësota dl start, che tl traviert, sun la sieves dl purtoi, sun la portes de garejeda y tla lueges dezijives dl purtoi uniral metù la scrita dl Südtirol. Frick ie dla minonga che chësc ie n bon retlam de image per nosta Provinzia dal sport da d’inviern. Nce i prudoc stampei, placac, scrites de retlam y i parëies per la ntervistes porta l logo dl Südtirol. La plates tl internet di doi urganisadëures de Copa dl Mond à mplù mo n link cun la plates ufizieles de promozion turistica www.suedtirol.infoUSP
