Atualità
Consultes di jëuni presenta prupostes a Durnwalder
Usp – Na lingia de prupostes per l lëur cun i jëuni ti proscimi ani iel ch’stadi unì presentà da pert dla consultes per i jëuni de rujeneda tudëscia y ladina al Presidënt dla Provinzia Luis Durnwalder. La consultes vëij l mpëni dla Porovinzia per l lëur cun mëndri y jëuni de bon uëdl. Sën se damanden dlongia la segurëza finanziela per l lëur cun jëuni nce la ntroduzion dl aucat per jëuni y na lege per straverdé mëndri y jëuni. L Presidënt Durnwalder à mpermetù de ulëi se mpenië per chesta cuestions.
L diretëur dl ufize per jëuni Klaus Nothdurfter y si rapresentanta Gertrud Gius cun la culaburadëura ladina Wilma Runggaldier à rujenà cun l Presidënt sun argumënc di jëuni per la proscima legislatura. La consultes per i jëuni se à detlarà cuntëntes che l ie unì auzà l contribut finanziel y che l lëur cun mëndri y jëuni ie unì ntergrà miëc tl ciamp dl’educazion, furmazion y dla cultura. Cun la fin dl 2003 fina nce l program de sustëni y promozion cun n bon resultat. Chësc program dëssa sën unì purtà inant. Dlongia l sustëni per l lëur de ulentariat ulëssen nce seguré l lëur per i jëuni per n tëmp plu lonch dal pont de ududa finanziel. L Presidënt Durnwalder a mustà cumperenscion per chisc bujëns dla consultes, juntan che l lëur per i jëuni dëssa pudëi resté sun si giames. Dantaldut dëssa l lëur per jëuni unì laurà ora dai jëuni nstësc, che ie do Durnwalder de gran mpurtanza. Nant iel da pert dl Presidënt dla Jonta unì segurà de se mpenië per l aucat di mëndri y jëuni a na maniera che l sibe dut njenià per pudëi pona dl 2005 fé na lege aldò. N pue’ sciche tl’Austria y tl Deitschlond iel nce tlo unì damandà de na lege che straverda i mëndri y i jëuni. Na tel lege vëij danora l cheder de dërt di jëuni y di genitores, te chël che l possa pona unì regulamentà velch plu avisa. N cont de chësta lege per jëuni muessel mo unì cialà do plu avisa sce l se trata bën de na cumpetënza dla Provinzia.USP
