Atualità
L Forum per lëures publics damanda na lege unitera
Usp – Mudazions ala lege provinziela sun la frabiches iel states l agrumënt dla sgonda ancunteda dl Frorum per lëures publics stata da permò. L ie unì a lum l bujën de regulé dut l ciamp di lëures, spedizions y servijes publics n cont de dé su i lëures, tres na lege provinziela nueva.
L dé su lëures, spedizions y servijes publics dëssa unì regluamentà da nuef. Chësc se damanda l Forum per lëures publics che fova unì metù su d’instà dala Jonta Provinziela. A defrënzia de autri paejes mancel tl Südtirol na lege organica che regluea l dé su di lëures sibe sëura, che nce sota la mesura per messei unì scrit ora a livel europeich. Nsci Georg Tengler, l diretëur dl ufize per dé sù lëures, pra chël che l vën tenì l forum. Plu avisa iel sota la presidënza dl assessëur Florian Mussner nce unì cialà ala mudazions dla lege provinziela nr. 6 dl 17 lugio 1998 che rejona dl dé su y dl fé lëures publics. Chësta mudazions reverda l dé su de lëures per n lot de frabica, l bilanz y aspec de contabilità y l sëurandé de spedizions y sevijes che à da nfé un lëures publics. Duc a una se an pona deltarà per la prupostes de njonta ala lege che ie bele. Y cun l dé pro dl statut possa l forum sën lauré te duta si funzions. Tl Forum per lëures publics ie rapresenteda l’Aministrazion Provinziela, i chemuns, aziendes saniteres, lies di mprenditëures, sindacac y cameres di mestieres dl frabiché. Si ncëria ie chëla de cialé do di lëures publics tl Südtirol, duvier che univa nchinamo fat dala Autorità statela de vigilanza per lëures publics cun sënta a Roma. Tl medemo tëmp piëta l Forum nce de mënter sun mëisa problemes che vën a se l dé cun l dé su de lëures publics y la manieres co che vën dai su i lëures. Mplu vëniel laurà odra prupostes, mustrà su manieres de miuramënt y nterpretà normatives.USP
