Atualità
La Scola Mesana de Urtijëi à venciù l pest LABEL
OSP - Duman juebia ai 11 de dezëmber 2003 furnea na delegazion dla Scola Mesana de Urtijëi cun l Ntendënt Roland Verra a Roma a pië do l pest sëurandat dala Ministra dla Istruzion Moratti. La scola à venciù l prim pest LABEL per la categuria scola mesana cun n proiet sun l’educazion linguistica ntegreda, l pest vën sëurandat ai mieur proiec sun la rujenedes.
La segonda tlass dla Scola Mesana de Urtijëi ova fat pea l ann passà l cuncors Museum(s)pass per duta la scoles mesanes. I sculeies messova jì ora per i cin’ museums dla valedes ladines. Da chësc pont à pona i sculeies cun si nsenianc laurà cun la rujeneda ladina, tudëscia y taliana. Resultat de dut chësc lëur ie stat n bel cudejel cun ntervistes, pitla nrescides y lecorc de duta chësta raides ora per la valedes. L Istitut Pedagogich Ladin IPL à pona mandà l proiet al Minister. N gran cumplimënt ti và ai sculeies dantaldut, ai maestri che à laurà ora l proiet cun i sculeies y a duc chëi che à judà pea: duc i nsenianc dl team dla scola, chëi che à ideà y finanzià l proiet, chëi che à abù la bela idea de lauré ora l proiet y mandé ite l lëur per tó pert al Pest Label.Na scumenciadiva che demostra che canche uni istituzion y uni persona mët si pert y si mpëni, possa l resultat vester garantì y porta a de boniscimi resultac, sciche arjonjer pesc' a livel naziunel.
USP
