Atualità
Cumpetënzes ai assessëures provinziei
Usp – N aspitova bele ert de nrescì coche unissa spartides su la cumpetënzes tla Jonta provinziela nueva. Pra la senteda de chëst’ ena iel mo unì rujenà de chësc y pona riesc do iel uni fat al savëi tla cunferënza stampa.
Pima cossa ie stata la nomina de Otto Saurer sciche prim Vizepresidënt Provinziel y Luisa Gnecchi sciche sgonda Vizepresidënta, pona iesen riesc passei ala spartizion di duvieres.L Presidënt Luis Durnwalder mantën la cupetënzes che l ova nchina sën, restan la persona de riferimënt per la direzion generela, l ënc locai, destudafuech y aiut zevil, forestela, la sperimentazion tl’agricoltura y tl forestel y la barieres per l’eghes.
L assessëuer Otto Saurer sëurantol la cupetënzes per la scola tudëscia y la furmazion profesciunela tudëscia y ladina. Chësc ciamp de lëur tol nce ite la cunsulënza profesciunela, i lerneri, l’Università liedia de Bulsan, l’Eurac, la cëses per sculeies y studënc, i cuntribuc per studi y l trasport di sculeies per duta la trëi grupes de rujeneda.
L’assessëura Luisa Gnecchi se cruzierà per i proscimi cin ani dla scola y furmazion profesciunela taliana, per l lëur, la defendura dl laurant y la igena tl lëur, l ciamp dla cooperatives y la inovazion tl’insustia y tl’artejanat. Lepro ruva mo la coordinazion per i imigrei. I ufizies che à da n fé cun chësc ciamp resta pra i dipartimënc che i fova nchin sën.
Al assessëur Hans Berger ti iel unì sëurandat i ciamps dl’informatica y telecomunicazion, liber fundier y cataster, sëuraprò al’agricoltura y lëur da paur, la furmazion per l’agricoltura y forestela. L assessëur Luigi Cigolla sëurantol da Berger l dipartimënt dl’avëi provinziel y se tën i ciamps dla cultura y frabiché abitiatif talian.
L’assessëura Sabina Kasslatter Mur ie la persona de riferimënt per la cultura tudëscia y la scunanza di monumënc, l’ëiles, familia y jëuni.
L assessëur Werner Frick se cruzia inant dl’economia, cun la ripartizion dla ndustia, cumerz, artejanat y servijes. Sëuraprò giatel nce cupetënzes per la finanzes y l bilanz.
L assessëur nuef Thomas Widmann sëurantol l muvimënt sun streda, l trasport, l turism y personal.
L auter assessëur nuef Richard Theiner ie respunsabl per l dipartimënt dla sanità y soziel. Michl Laimer, resta assessëur per l’urbanistica, ambiënt y energia. Per l daunì ne al nia plu la cumpetënza sun la nfurmatica y la telecomunicazion.
Deguna mudazion ne iel per Folrian Mussner, ël resta inant assessëur per lëures publics, la scola y cultura ladina.
Aldò de Durnwalder pudessel mo unì a se l dè na mudazion pra l personal. Sën se tratla mo de sotscrì l decret per ufizialisé la cupetënzes tla jonta nueva.
USP
