Atualità
Cuncors per nsenianc de scoles mesanes y autes ladines
Usp – Tl „bollettino ufficiale“ dla Region da inier 9 de fauré iel unì publicà l cuncors per nsenianc dla scoles mesanes y autes ladines. La dumanda per chësc cuncors ie da dé ju nchin ai 10 de merz 2004 tla Ntendënza Ladina a Bulsan. Duc i nsenianc che à l titul de amiscion, l diplom sun la cunescënza dla trëi rujenedes y i autri criteries de amiscion possa fé dumanda. I ejames dl cuncors ie udui danora per l ansciuda 2005. Per chësta ucajion vëniel nce metù a ji cursc de preparazion.
Al cuncors possa fé pea i maestri cun n titul de studi y l diplom sun la cunescënza dl tudësch, talian y dl ladin. Per uni materia y per uni livel de cuncors muessel unì dat ju na dumanda a pert. I formulares ie da abiné deberieda cun la nfurmazions sun l cuncors, tl internet sota www.provinz.bz.it/intendenza-ladina Chi che ne ëssa nia l’abilitazion al nseniamënt y ulëssa mpo fé pea l cuncors per l arjonjer, muessa junté prò la zedula de avëi paià ite 33,05 Euro sun l cont dla banca nr.1016, Ufize de reghister, „tribut de cunzession – tribut de scola“. Chi che ne à deguna abilitazion al nseniamënt y ulëssa fé pea l cuncors te de plu materies o liviei muëssa paië ite aldò. La zedules per paië ite ie da abiné ti ufizies de posta. I nsenianc che à i criteries de amiscion, possa mo dan l ejam scrit y a usc, fé pea n curs de preparazion debant. I programes plu avisa, la modaliteies per se scrì ite y la nfurmazions essenzieles vën mo fates al savëi proscimamënter. L ejam de cuncors ie udù danora per l’ansciuda dl 2005. La nuvità de chëst iede ie che i nsenianc dla scoles mesanes y autes possa nce de jù n ejam ulenter sun la tecnologies dla nfurmazion y comunicazion. Chësc ejam ie udù dant n ucajion di ejames a usc. Nteressei a cuncors muessa de jù la dumanda nchin a n mierculdi 10 de merz 2004 tla Ntendënza Ladina, str. Binder 29 a Bulsan. Nfurmazions plu avisa y stlarimënc ie da giapé tla Ntendënza dal dut. Paolo Tasser, numer de telefonn 0471 417018.USP
