Diretëur nuef per la ripartizion scola y cultura ladina
USP – L diretëur dla scola auta Raetia de Urtijëi, Alexander Prinoth ie l diretëur nuef dla ripartizion per scola y cultura ladina. Prinoth à venciù l cuncors publich y ie inier lunesc unì numinà dal Guviern Provinziel diretëur de ripartizion nuef.
L diretëur de ripartizion nuef Alexander PrinothAlexander Prinoth de Urtijëi sëurantulerà dal prim de auril 2004 la ncëria de Alfredo Irsara tla ripartizion scola y cultura ladina. Prinoth (nasciù dl 1955) à fat la scola auta per l cumerz a Urtijëi y l studio de dërt al’univesità de Firënza. Dal 1980 nchin al 1983 al laurà tla presidënza dla Jonta Provinziela. Per diesc ani ie Alexander Prinoth stat prufessëur de dërt tla scola Raetia de Urtijëi y ie tlo nce stat diretëur dal 1993 nchin sën. Tl Chemun de Urtijëi iel dal 1985 nchin al 1990 stat assessëur per la scola y jëuni. Sciche nuef y sëul diretëur de ripartizion possa Prinoth mustré su na furmazion tl ciamp dl management scolastich y n’atività de plu ani sciche referënt tl ciamp scolastich.
