Mussner, Grisenti y De Bona: valorisé la Dolomites
Usp – Dla Dolomites y la cater stredes di jëufs te chësc raion se tratovla pra l’ancunteda de n merdi 23 de merz a Bulsan danter l assessëur Florian Mussner, l presidënt dla Provinzia de Belun Oscar Di Bona, l assessëur al muvimënt sun streda de Trënt Silvano Grisenti y rapresentanc di chemuns y dl ciamp turistich. La Dolomites ne dëssa nia deventé n museum gratis cun stredes da transit, foven a una. L di per chëi dala rodes dle lugio, ulache la stredes di jëuf unirà dsaredes ai mesuns a motor, dëssa simbolicamënter sorissé l valor dla Dolomites y de si natura.
L’ancunteda danter l assessëur Florian Mussner, l Presidënt dla Provinzia de Belun Oscar Di Bona, l assessëur al muvimënt sun streda dla Provinzia de Trënt Silvano Grisenti y i rapresentanc di chemuns y dl turism.Manco muvimënt sun streda y de plu respet per la natura ie chël che Mussner, Di Bona y Grisenti cun i rapresentanc dl chemuns y dl turism uël purté a cuscienza dla jënt n cont di jëufs dla Dolomites. L valor dla cuntreda dolomitica straordinera dëssa unì valorisà simobolicamënter. Per chël se an lascià tumé ite velch de particuler. Per l 8 de lugio iel udù dant de ti pité la stredes dl Sela, Frea, Ciaulunch y Pordu a chëi dala rodes, les dessaran per l muvimënt a motor. Chësc di dëssa avei na funzion simbolica, ma ne basta dessegur nia per resolver la cuestion di jëufs, foven a una. La scumënciadiva dëssa unida proieteda drët bën a na maniera che la ne porte nia dificulteies sun d’autra stredes.
Na cumiscion de set persones se cruzierà ntan la proscima doi enes de proieté apuntin l di per chëi dala rodes. Dantaprima se tratl de nfurmé chëi che se muef sun streda che i jëufs unirà dessarei n chël di.
Chësc ie me n prim va à dit i rapresentanc dla trëi provizies. Mo d’autri pruvedimënc dëssa valorisé la Dolomites y smëndrì l muvimënt de transit. „La Dolomites ne ie nia n museum gratis“ à dit l presidënt dla Provinzia de Belun. Te autri raions muessen paië. La ntroduzion de n daz per i jëufs dla Dolomites fossa almanca na puscibltà de judé a finanzië l mantenimënt dla stredes di jëufs. L presidënt dla Provinzia de Bulsan lascia al mumënt cialé do la pusciblteies ududes dant dala lege per mëter a ji de fé paië n daz. Nce per chësta cuestion dëssel unì metù su na cumiscion tecnica se mbincia i rapresentanc dla trëi provinzies. Ntant ulëssen to su cuntat cun la region de Aosta, te chëla che l vën bele laurà cun n daz. Te n valgun’enes dëssa l argumënt dl daz tla Dolomites unì tratà pra n’autra ancunteda di rapresentanc dla trëi provinzies. Te chësta ucajon dëssa unì fat al savëi i cumëmbri dla cumiscion tecnica.
USP
Galaria dales fotografies
L’ancunteda danter l assessëur Florian Mussner, l Presidënt dla Provinzia de Belun Oscar Di Bona, l assessëur al muvimënt sun streda dla Provinzia de Trënt Silvano Grisenti y i rapresentanc di chemuns y dl turism.
