Atualità
San Martin: Pröms intervënc por la costruziun nöia dl Punt „Cor“ a Piculin
USP - En lönesc, ai 29 de merz gnaràl metü man i pröms laûrs por la costruziun dl punt “Cor” a Piculin. Por podëi garantì la viabilité gnaràl impröma arjigné na deviaziun provisora.
La deviaziun provisora (sciöche an vëiga dal dessëgn) ie lungia 80 metri y ie a man ciampa dl punt. Al vëgn insciö assiguré la viabilité de entrami i versc tratan i 140 dis de laûr preodüs. “Le punt fat sö tl ann 1921 ne po te sües condiziuns da śëgn nia plü garantì la segurëza al gran numer de mesi che passa sön chësta strada y che che aumënta da ann a ann, sc’an pënsa che i auti che passa à n valur mesan de 5.000 al dé y ch’an röia a numeri ćiamò cotan’ plü alć tratan la sajun da d’invern”, dij l’assessur competënt Florian Mussner.Atualmënter é le punt 13 metri lunch y 5,25 metri lerch. Do la conclujiun di laûrs ciafarà le Comun da San Martin, mo inće döta la Val Badia n punt cun na larghëza de 10,5 metri y implü n marciapîsc de 1,5 metri che portarà inćina ala ostaria “Posta” a Piculin.
La portada consentida dal punt vedl toma ite te na secunda categoria, le punt nü gnarà tlassifiché de portada de pröma categoria, che corespogn a na portada de 60 tonelades.
I cosć preodüs é de 374.400 Euro y i laûrs gnarà fać dala Dita de costruziun “Impianti Colfosco S.p.A.” sot al diretur di laûrs inj. Gustav Mischí da Longiarü dl Ofize infrastrotöres dla Provinzia.
Preodüdes é inće döes fermades dla coriera atira do le punt; öna a man ciampa y l’atra a man dërta, por podëi arjunje plü saurì la sënta dl raiun sanitar a Piculin.
USP
