Atualità
Milesc se arjuma de paië la chëuta per l auto
Usp – Per milesc de auti ne iel ntan i ultimi cater ani nia unì paià ita sciche toca la chëuta. Aldò dl Ufize Provinziel per la Chëutes nen fovel ntan l ultim ann ntëur 25.000. L lëur che se damanda truep tëmp y organisazion ie sën duvier dla Provinzia. L assessëur ala finanzes Werner Frick cunsiëia de paië ite tres sitemes segures sciche l internet, la butëighes autorisedes o tres l ACI.
L desplej a messei mandé via uni ann milesc de solecitazions a chëi che ne à nia paià ite la chëuta sun l auto, scrij Fernando Bettega l diretëur dl Ufize provinziel per la chëutes, te n comunicat. L ie mo for massa ngrum che se arjuma l di da paië ite o che paia ite massa puech, che da sëura n auter numer de targa o l fauz tëmp, scrij Bettega inant. Chëi che ne paia nia ite la chëuta per l auto sciche l toca giapa na comunicazion dala Provinzia. Te n ann nen iel 25.000. Chëi che ne paia pona mo for nia giapa n sgondo amunimënt, y de chisc nen veniel fat 9.500 al ann. Sce l ne vën pona mo for nia paià ite veniel mandà n terzo scrit y de chisc nen iel uni ann 5.500. Nce sce pra la majera pert di caji se tratl de te che se à arjumà de paië ite, ie uni zitadin npò nstes respunsabl de dé ju la drëta nfurmazions canche n paia ite. La chëuta per l auto possa unì paieda ite tla Posta, tres internet, tla butëighes autorisedes, ti ufizies provinziei dl Automobilclub ACI y tl’agenzies per auti. La majera pert di fai ie unic usservei pra i paiamënc tres posta. Per chësta rejon cunsiëia l assessëur Werner Frick de se nuzé di sistemes plu segures che funzioneia me sce n dà ite la nfurmazions schiche l toca. Tres na campania de nfurmazion uël l Ufize provinziel stlarì y nfurmé la populazion sun la chëuta per l auto y la pusciblteies de paië ite. „La cumpëida de chëi che se ajuma da piaë ite chësta chëuta muessa a uni maniera unì smendrida“ se mbincia Frick.USP
