Scora elementara da La Val ressanada deplëgn – festa dla scora
USP - En presënza dl assessur Florian Mussner, de scolars y insegnanc’, responsabli dla scora y rapresentanc’ dl comun él gnü surandè en sabeda, ai 24 d’aurì la strotöra ressanada cun na gran festa por la scora. Garatada ince la decoraziun artistica realisada da Alfred Tavella en colauraziun cun i scolars dla scora.
I protagonisc’ dl’inauguraziun dla scora elementara da La Val é stà les scolares y i scolars.I protagonisc’ dl’inauguraziun dla scora elementara da La Val ressanada y sëgn sciöche nöia é stà les scolares y i scolars dla scora che desmostra te de te’ ocajiuns süa bravüra y capacité. I scolars de dötes les tlasses à portè dant manifestaziuns de ligrëza por chësc frabicat, sotrissan ince l’aspet pluriliguistich dla scora ladina. Dl 1972 êl gnü daurì la “scora nöia” da La Val, la scora vedla é gnüda trata jö y à lascè lerch ala ciasa de comun nöia cun ofizi por la posta y la Cassa Raiffeisen. Tröc insegnanc che é stà a La Val à de n contribut nia ma ala scora, mo ince ala cultura ladina. La Val é cun sü 94 scolars la seconda plü gran scora dla Val Badia. “Le frabicat ne corespognô bele di nia plü ales normes de segurté, le tët à messü gnì trat jö, i func, les finestres y l’implant da scialdè à messü gnì fac danü, restè él prësc ma plü i mürs”, à dit l’ombolt da La Val Franz Complojer. L’assessur Mussner à sotrissé le bun laûr de coordinaziun fat intratan l’isté zënza avëi porchël messü renunzié ala cualité “Na te’ buna coordinaziun ne vëigun nia gonot” àl dit cun ligrëza, odon tan garatà che i laûrs é. Al à ince anunzié tan l’importanza dla scora por la formaziun dla porsona te n tëmp de tröpes reformes. La Junta provinziala à dè le 90 % di cosc’ en forma de contribut, plü avisa 1.186.000 Euro.
Laldè é gnü l’impëgn dl assessur ala scora Iaco Schuen, che à albü gran bries y fistidi por coordiné i laûrs te püc’ mëisc. Contëntes ince les maestres che é gnüdes tutes ite tles dezijiuns da impröma insö. “Insciö él ince plü saurì da se identifiché cun la strotöra y da la sintì plü nosta”, ares instësses lascè aldì.
La scora elementara da La Val é sëgn ince da conësce da defora ia, dedô che Alfred Tavella à davagnè le concurs por l’abelimënt dla falzada. Adöm cun scolares y scolars dla scora àl realisé i simboi che la scora se tol dant: le cör, le raisplais, la man, le cé, le jüch. Chësc aspet é ince gnü sotliné dal ispetur Lois Ellecosta. Rengraziamënc por la buna realisaziun é ince gnüs dal diretur raional Otto Moling.
Bele a scomenciamënt à le ploan Iaco Ploner benedì la strotöra scolastica, olache ël instës é insegnant de religiun. Ince i geniturs él gnü dit che n’à sconè degüna bria tl tëmp dl ressanamënt dla scora, sides cun le plindernè co tl abelì la festa da en sabeda, olache umes y peri à daidé dassënn, forman insciö na comunité de scora tlera.
I protagonisc’ dl’inauguraziun dla scora elementara da La Val é stà les scolares y i scolars.
La scora elementara da La Val ressanada y sëgn sciöche nöia.
USP
Galaria dales fotografies
I protagonisc’ dl’inauguraziun dla scora elementara da La Val é stà les scolares y i scolars.
La scora elementara da La Val ressanada y sëgn sciöche nöia.
