Atualità
Widmann se aspieta n record tl turism da inviern
USP – Drët cuntënt se à mustrà l assessëur per l turism Thomas Widmann sun la zifres atueles dl turism da inviern tl Südtrol che mostrà sù n gran aumënt pra i turisc’ che vën dai paiejes dl Benelux. Widmann ie dla minonga che chisc resultac desmosta che l ie stata la drëta decijion per l Südtirol a se giaurì a marceies nueves te chëi che l ie da abiné l daunì turistich.
51.000 turisc’ dl Benelux ie danter dezëmber y fauré unic tl Südtirol, 13.000 deplu permez al medem tëmp tl ann passà. Chisc turisc’ fej ora l cin percënt dla nuetes afitedes ntan l inviern. Pra i marceies prinzipiei dal Deutschland y dala Talia ie unì arjont aumënc. La majera pert dl turism da inviern tl Südtirol fej ora chisc doi paejes cun 473.000 tudësc y 648.000 taliani danter dezëmber y fauré. Te chisc trëi mënsc ie unì cumpedà n aumënt de 70.000 tudësc y 87.000 taliani permez al ann dant. La marueia ie aldò de Widmann che nce tlienc dala Svizra y dal’Austria vën for de plu d’inviern tl Südtirol, scebën che i sciazea dassën l atmusfera mediteranea tl Südtirol ntan i mënsc plu ciauc. Chëst ann ie unì cumpedà 13.000 persones dala Svizra y 24.000 dal’Austria, che fej ora n aumënt de 2.000 y 1.000 persones permez al ann passà. L svilup dl turism da inviern ie da udëi de bon uedl. L aumënt di turisc’ che ie ruvei adalerch de 14% y pra la cumpëida dla nuetes afitedes de 9 % sun duc i marceies, mostra che la vela piteda tl Südtirol ntan l invern mantën i vedli tlienc y nen fej unì de nueves. La cumpëides nchin a fauré va de viers de n inviern da record. Cun chësta bona prospetives iel da se aspité n bon svilup dl turism sciche l ie stat tl ann 2003, se ncunforta Widmann.USP
