Atualità

Frabiché | 19.05.2004 | 10:00

De plù lëures per miuré la stredes de Gherdëina

Ast -Sun la streda de Gherdëina vëniel laurà te cater luesc. Trëi lëures ie unic metui man da Pruca ite y un sota Plan de Gralba. „La segurëza sun streda ie nce cualità de vita“, à dit l assessëur ala stredes Florian Mussner y nscì cëlen di ti ruvé do al bujën de cumedé ca stedes te duta la Provinzia. Al mumënt iesen tl lëur de purté inant passa 430 proiec per l miuramënt dla stredes dl Südtirol.

Do Pasca canche l ie n pue’ manco muvimënt te Gherdëina y l tëmp juda pea an riesc metù man cun i lëures plu de prëscia sun la streda da Pruca ite. Riesc dedit da Pruca (al km 1,7) fovel truep sasc y material che manaciova de uni jù sun streda. Cun na serie de micropei y tiranc, 15 metri lonc che à la funzion sciche na brocia, iel sën bele unì segurà l parëi per pudëi fé l mur da nuef sun na lunghëza de ca. 150 metri. Permez a ruf vëniel fat l ëur de streda plu segur cun n dlander de streda nuef. Chisc lëures dla firma Gregorbau sota la direzion dl ing. Luciano Franceschini vën a custé 306.000 Euro. N fej cont de finè chësc lëur per la fin de juni.

Sota l „Gran Sas“, a 2,3 km da Pruca vëniel slargià la streda da doi pertes y tëut demez la raida dassënn strënta. L fin de chisc lëures ie ora de miuré la segurëza sun streda nce chël de miuré la visibltà per i auti y la curieres. Dessëurapert dla streda iesen tl lëur de fé n mur de sas nuef sun na lunghëza de ca. 85 metri. Tlo iel n iede debujën de seguré l rone cun peton sprizà sun la rë de fiertrat. N plu iel mo stat debujën de fé su na prutezion acioche i sasc ne posse nia unì jù sun streda. La streda vën dessotpert slargeda cun n pitl ëur sëura l ruf, che sta tl air schiche n solder. Per mez lugio se aspieten de finè chisc lëures che vën ënghe fai dala Gregorbau sota la direzioin dl ing. Giovanni Benussi. I lëures vën te chësc cajo a custé 349.000 Euro.

Sëura l luech dl Dirsching, tl Chemun de Laion arsiva bel plan la streda. Per na spëisa de 294.000 Euro iel tlo sën unì metù na rissa de micropei sun chëi che l vën fat l mur de sustëni nuef. Suinsom dl majer ërt uniral fat sun na lunghëza de ca. 15 metri n ëur de streda che sta sëurora sciche n solder. I lëures sota la direzion dl ing. Alessandro Ferro vëija dant de mëter da japé dl ërt sù y sù n dlander de streda nuef. L ie udù dant de finé nce chisc lëures dla firma Alpengeo ie nchin a mez lugio.

Dan ruvé sun Plan de Gralba ie l n mur de streda drët stlet. Tlo à la firma Injekto Bohr metù man a mëter ju micorpei y tiranc per pudëi pona ti fé n mur nuef dansù. Chësc lëur sota la direzion dl ing. Massimo Padoan ie debujën sun 130 metri de lunghëza. Nce tlo iel pona debujën de n ëur de streda cun l dlander nuef. L custimënt per chësc lëur ie de 200.000 Euro. Do l inviern iel unì ora che plu inant ie l mur dessot pert de streda ënghe drët stlet y nscì cialeran de tó ite nce chësc toch tl ressanamënt. Tlo fejen cont de pudëi finé i lëures per la fin de lugio. Danter al raida da Merch y Plan de Gralba iel te de plu luesc debujen de cumedurdes, sën iesen tl lëur de purté inat la proietazion per cumedé la streda nce te duc chisc luesc.

Ultimamënter iel unì finà de mëndri lëures de mantenimënt sun la stredes. Sibe a Soplajes che pra la rundela a Urtijëi, danter S.Piere y Laion, Tanurz, Albions y Gudon iel unì asfaltà da nuef. L ncrëusc per jì a pra la stazion de Tluses ie unì miurà y ie nscì danterauter plu segur per la curieres.

Per la streda da Pruca ite iesen tl lëur de studië la miëur soluzion per slargé la steda pra l ncrëusc che mëina a Solaion. Tlo an doi prupostes: to demez la cësa uëta o scenò slargë la streda dësseurapert ulache l ie n majer mur. N lëur che n ulëssa afrunté tl ann 2005.

L assessëur ala stredes Florian Mussner rengrazia per la cumprenscion de chëi che muessa passé sun streda ntan i lëures.

AST

Galaria dales fotografies