L assessëur Mussner n cont dl di mundiel per l svilup culturel - duman 21 de mei
USP – „La cultura ladina dëssa unì mantenida y giapé lerch per se svilupé inant – tl medem mumënt iel nce debujën de sustenì l barat cun d’autra cultures dl Südtirol y dl’Europa“. Chësc ie l pensier che l assessëur ladin Florian Mussnser porta dant n ucajion dl di mundiel per l svilup culturel de duman, numinà dala UNESCO.
Mussner se mbincia l dialog danter la cultures per les svilupé inant„I Ladins dëssa fé na riflescion sun la storia che i à deberieda, i valores y la cultura che i à deberieda, cun duta si particulariteies“, a chësc uël l assessëur Mussner dé pëis n ucajion dl di mundiel per l svilup culturel de duman vënderdi ai 21 de mei 2004. „La basa per l’identità culturela de na grupa de rujeneda, nce sce la ie mo ntan pitla, ie l mantenimënt de si rujeneda dl’oma, l se render cont dl valor y la legrëza dla dé inant“, dij Florian Musssner. Do chësta idea vën nce sustenì proiec culturei ladins d’uni sort. „Sce n mantën y cura la particulariteies dl luech, ne uel chësc nia di che n se stluj de viers dl’autra cultures“, ie la minonga de Mussner. Sun dut l mond iel ngumon de populi cun si rujenedes, tradizions y si identità. „L di muindiel per l svilup dla cultures dëssa mustré sù la carateristiches cultureles ma tl medem mumënt nce motivé al dialog danter la defrënta cultures“, se mbincia l assessëur ladin. „L savëi nëut un cun l’auter dla vita culturela ladina y dla cultura dl’autra grupes de rujeneda muëssa unì miurà a na maniera che la cultures possë se arichì una cun l’autra y se svilupé inant“ dij Mussner. Per n miëur cunviver iel n gran bujën de dialog y barat culturel danter la jënt. L assessëur ladin nviëia duta la jënt a tenì pea tla vita culturela y tl dialog culturel.
USP
Galaria dales fotografies
Mussner se mbincia l dialog danter la cultures per les svilupé inant
