Atualità
Bënsté per la utia de Fodara Vedla y l Lech de Sompunt
USP – La Sgonda cumiscion per la defendura dl’ambient à ncuei, merdi 8 de juni tëut tres ndut 18 proiec. Danter i proiec che à giapà l bënsté dala cumiscion cun si presidënt Adriano Oggiano iel nce la utia da mont sun Fodara Vedla y l Lech de Sompunt tla Val Badia.
La utia da mont sun Fodara Vedla possa unì ressaneda, nsci iel unì fat ora dala Sgonda cumiscion provinziela per la defendura dl’ambient. La utia ie a 2.000 metri de autëza tl Parch naturel Fanes-Sennes-Braies tl chemun de Mareo. Sciche spiega l presidënt dla cumiscion Adriano Oggiano se trata l ressanamënt dantaprima di mplanc saniteresc tla utia fata de sas y de lën. Davia che pra la utia nstëssa ne vëniel nia mudà truep, ne cumporta chisc lëures nce no na gran mudazion per la cuntreda, nscì la rejon per l bënsté positif.L lech de Sompunt tl Chemun de Badia, detlarà monumënt ambientel, dëssa unì njenia cà da nuef. La Sgonda cumiscion per la defendura dl’ambient à nce tlò dat si bënsté positif. L lech che ie sun puscion privata unirà pumpà ora, rumà ora da ledam y ressanà ntëur sù. La cumiscion se damanda che l vënie laurà cun gran prudënza. Per chësc lëur vala de vester a una cun l Ufize provinziel per l’ecologia ambientela.
USP
