Atualità
Mostra sun Caterina Lanz tl Museum Ladin
USP – A Caterina Lanz, cumbatënta per la libertà de si popul ie dedicheda na mostra tl Museum Ladin a San Martin de Tor. L’ucajion de chësta mostra pieta i 150 ani dala mort de Caterina Lanz, nasciuda a Al Plan de Mareo tl 1771 y morta te Fedom tl ann 1854. La giaurida dla mostra ie n dumënia ai 11 de lugio.
Caterina Lanz ie cunesciuda nchin te nosc dis davia che la dëssa avëi cumbatù cun i uemes dl Tirol contra i franzëusc tla prima risses cun na fëurcia dal fën. De plu tofles fej mo aldidancuei lecurdè a Lanz. Si majer monumënt ie te Fedom ulache la cumbatënta dëssa nce vester suplida. Davia che Catarina Lanz ie nasciuda a Al Plan de Mareo ie l liam cun la populazion y la storia ladina drët sentì.L Museum Ladin a San Martin de Tor à dedicà na sala ntiera a Caterina Lanz. Sëuraprò ai chedri, possen tlo nce udëi ermes y la sables dl tëmp de Napoleon. La tuedes scientifiches sun la batalies per la libertà dl Tirol y sun Caterina Lanz ie unides curedes da Lois Craffonara. Ël à nce scrit i tesć sun la batalies che ie da pudëi liejer tl Museum Ladin.
L dì dla mort de Lanz, ai 8 de lugio possa nteressei dala 9 da sëira scuté su n referat tla rujeneda taliana sun „Caterina Lanz, l’eroina de Mareo“. La dumënia ai 11 de lugio 2004 unirà dala trëi domesdì giaurì ufizialmënter la mostra. Te chesta ucajion presenterà Lois Craffonara l referat tla rujeneda tudëscia. La festa de giaurida unirà cumpanieda dala Mujiga de Al Plan de Mareo, grupa che porta l inuem de Caterina Lanz. Duc i nteressei ie nviei ala festa de giaurida dla mostra.
I rapresentanc di media ie nviëi ala giaurida dla mostra,
n dumënia ai 11 de lugio 2004 dala trëi domesdi
tl Museum Ladin a San Martin de Tor
y dl comuniché tres si media.
USP
