Atualità

Ambiënt | 04.08.2004 | 17:29

Jita- quiz Parch naturel Fanes – Sennes – Braies ai 14 de agost

USP – N sada 14 de agost uniral a Valdaora fat la jita - quiz tl Parch naturel Fanes – Sennes – Braies che fova unida desdida de lugio per l bur tëmp. Te chesc quiz se tratla de savëi y de ti avëi l fortl a fé juesc che vën fai sëuraprò ala dumandes sun natura, cuntreda, cultura dl luech y usanzes. Sibe granc che pitli possa fé pea chësta jita – quiz. L unirà muet dala 12.30 nchin ala 14.00 pra la ustaria „Panorama“ a Valdaora ulache n pudrà pona nchin ala 16.15 inò de jù la dumandes dl quiz.

„Jites – quiz porta na gran hez nia me per chëi che fej pa, ma nce per i assistënc y les à tan suzes che ne les tulon nia plu ora dl program dl „viver la natura“ dl Parch naturel Fanes – Sennes – Braies, dij Markus Kantioler, culaburdëur l Ufize provinziel per i parcs naturei y urganisadëur dla manifestazion. La lia catolica per la families y la lia turistica de Valdaora sustën nce chëst ann la manifestazion. Chëst iede uniral jit dala ustaria „Panorama“ a Valdaora su per la streda forestela nchin sota la mont Angerer. Da tlo porta la raida inò de revieres per n troi nchin a ulach n ie muec. L vën fat cont che n adrova n ëura y mesa a fé chësta raida. La streda ie tenida bën y saurida da jì. A respuender al quiz se fajerà chëi plu saurì che ti sà nëut ala teoria, ti ie manëcia ai juesc, che à n bon nes y na bona sensibilità. La se trata de respuender a dumandes sun floria, fauna, geologia, parcs naturei y nsci inant, ma nce de ti vester ala proves de tufé, de sentì y de tuché a tré vel cossa. Dut chësc tl certl de juech y devertimënt. Ai miëures ti spieta de biëi pesc´. Do la raida salral la lia catolica dla families a pité velch per chëi che à fat pea. „I concurënc dëssa se dé jù cun nosta cuntreda y svilupé l uedl per i tieres, plantes y ntraunides tl natura che n sëuravëij suvënz“, dij Kantioler n cont di fins dla manifestazion.

USP

Galaria dales fotografies