Atualità
Secunda incuntada cun auturs ladins
Tröpa jënt à tut pert ala sëra de letöra y discusciun cun l’auturia Maria Pedevilla y l’autur Ivan Senoner che la Repartiziun provinziala Cultura Ladina à metü a jì l’edema che é stada a La Ila. La proscima sëra de letöra d’autur gnarà tignida en jöbia, ai 25 de novëmber a Urtijëi.
Pro la sëra de leteratöra metüda a jì a La Ila à Maria Pedevilla y Ivan Senoner lit fora dles cunties premiades en ocajiun dl concurs leterar “Auturs ladins scrî ...”. Dedô à l’ispetur dla scora Lois Ellecosta daurì na discusciun sön la leteratöra contemporanea ladina. Le prou Iaco Ploner à dit che plüdadî dess l’interès por la leteratöra ladina ester stè majer co al dedaincö: al gnô pö inće rajonè de ”Aisciöda leterara”. Indere incö ti manćia al ladin sovënz les regoles y le lingaz n’é nia plü nët. La cuantité ne manćia dessigü no nia deache la metüda en stampa de operes leterares vëgn sostignida dassënn dales istituziuns, mo ći che fala é plütosc la cualité à sotrissé Iaco Rigo. “Le lingaz ladin é zënzater adatè por la leteratöra mo les parores dess gnì cernüdes cun plü sensibilité”, à afermè Iaco Rigo. La proscima sëra de letöra gnarà inviada ia en jöbia, ai 25 de novëmber 2004 dales 20.30 tla scolina “Salieta” a Urtijëi. Maria Pedevilla y Ivan Senoner presentarà sü tesć. Ala discusciun sön l’importanza dla leteratöra ladina te Südtirol che gnarà tignida atira dedô, tolarà pert Ferruccio Dalle Cave, Brunamaria Dal Lago Veneri, David Lardschneider y Frida Piazza. Da moderadù fajarà l’intendënt ladin Roland Verra. Dötes les porsones interessades é inviades a tó pert.USP
