Atualità
Sëres d’informaziun sön i criters por fà domanda de contribut por la cultura ladina 2005
Les lies culturales ladines po presentè domanda de contribut por ativitês culturales ala Provinzia cina ai 31 de jenà 2005 à comuniché l’Assessur ala cultura ladina Florian Mussner. I formulars por fà domanda de contribut gnarà portà dant dal Ofize cultura y scora ladina te döes sëres d’informaziun ai 6 de dezëmber 2004 a Urtijëi y ai 10 de dezëmber 2004 a San Martin de Tor. Dötes les porsones interessades é dër bel inviades.
L’Ofize cultura y scora ladina dla Provinzia da Balsan organisëia döes sëres d’informaziun – öna a San Martin de Tor y öna a Urtijëi – en ocajiun dla presentaziun di formulars nüs de domanda de contribut por la cultura ladina 2005. I formulars de domanda nüs gnarà partis fora en ocajiun dles sëres d’informaziun, en lönesc, ai 6 de dezëmber 2004 a Urtijëi tla scora elementara y en vëndres, ai 10 de dezëmber 2004 a San Martin de Tor tl Istitut Ladin “Micurà de Rü”, dagnora dales 20.00. I formulars cun les spligaziuns por fà domanda de contribut por ativitês y investimënć culturai, ativitês de formaziun culturales y ativitês artistiches por l’ann 2005 po inće gnì desćiarià dala rëi zivica dla Provinzia sot ala misciun www.provinzia.bz.it/cultura-ladina. Le terminn por dé jö les domandes é ai 31 de jenà 2005. Les domandes po inće gnì ortiades por posta ala Provinzia Autonoma de Balsan-Südtirol, Ofize cultura y scora ladina, Bindergasse 29, 39100 Balsan, ćina a chësc terminn. Te chësc caje vel le timber dla posta. Por investimënć pol gnì fat domanda tratan döt l’ann. Chëstes y d’atres informaziuns contignüdes tla zircolara injuntada al formular de domanda gnarà spligades tratan les döes sëres d’informaziun. Dötes les porsones interessades é dër bel inviades a tó pert ales sëres d’informaziun.USP
