USP - Propi por le tëmp da carlascè mët a jì le Museum Ladin Ciastel de Tor a San Martin na mostra dal titul “Dal Carlascè ala vita” che gnarà tignida daverta dal 20 de jenà 2005 inant. Da odëi saràl les mascheres dl artist Rinaldo Cigolla y d’atri sü laûrs.
Mostra da carlascè tl Museum LadinLe tema zentral dla mostra a San Martin de Tor é les mascheres. Les operes de Cigolla nes mostra sciöche le significat ascognü dl carlascè po afasciné. Cun sües mascheres che se desfarenziëia te süa forma y espresciun nes lascia l’artist odëi sciöche individuums po ester tl medemo tëmp n gröm d’atres porsones. “La mostra sarà partida sö te döes perts: öna reverda les mascheres y l’atra rapresentëia d’atri laûrs dl artist” spliga le diretur dl Museum Stefan Planker. La mostra gnarà daurida en jöbia ai 20 de jenà 2005 dales 18.00 tl Museum Ladin Ćiastel de Tor. Ala daurida dla mostra sarà presënć l’artist instës, le Presidënt di museums provinziai Bruno Hosp y le Vizepresidënt Heinrich Huber. I laûrs de Rinaldo Cigolla podarà gnì amirà vigni mercui, jöbia y vëndres dales 14.00 ales 18.00 tl Museum Ladin a San Martin de Tor ćina ai 18 de forà. L’entrada é debann.
I massmedia é dër bel invià
a tó pert y a documentè la daurida de chësta mostra
en jöbia, ai 20 de jenà 2005, dales 18.00
tl Museum Ladin Ćiastel de Tor, strada Tor 72, San Martin de Tor.
