Atualità
Al é gnü fora les materies dl secundo ejam scrit tles scores altes ladines
USP – Sëgn sa les scolares y i scolars de cuinta tlassa dla scora alta co s’arjigné ca plü avisa ai ejams de maturité. Adöm al Ministêr dl’istruziun à l’Intendënza Ladina fat fora les materies che sarà oget dla secunda proa scrita pro i ejams de maturité dl ann de scora 2004/2005.
Tles valades ladines él chësc ann les cuintes tlasses de ma trëi scores altes che fajarà i ejams de maturité y plü avisa les cuintes tlasses dl Istitut tecnich por le comerz a La Ila y a Urtijëi y la cuinta tlassa dla Scora d’ert a Urtijëi. Chësc ann ne n’él tl Lizeum linguistich a La Ila degöna cuinta tlassa. Le terminn di pröms ejams scrić é le 22 de jügn 2005. Tles scores altes ladines él da dè jö le pröm ejam scrit tles materies talian o todësch. Ti Istituć tecnics por le comerz da La Ila y Urtijëi é le secundo ejam scrit economia aziendala. Pro la secunda proa scrita mëss les scolares y i scolars dla Scora d’ert desmostrè so savëi tles materies ert dl lëgn, decoraziun pitorica-plastica o grafica. Por le pröm iade vëgn te chësc ann de scora partì sö le terzo ejam scrit sön dui dis: le pröm dé vëgnel damanè fora le secundo lingaz y le secundo dé él odü danfora l’ejam interdisciplinar.USP
