Atualità

Trafich | 04.02.2005 | 15:38

Plü segurëza sön la strada de Gherdëna a Pontives

USP - Cun dui intervënc ô la Provinzia miorè la segurëza sön la strada statala 242 dla Val Gherdëna tla localité de Pontives. Ti proscimi dis gnaràl scrit fora i laûrs por mëte jö rëis de proteziun cuntra la tomada de peres y por fà sö sis. Le secundo intervënt é la costruziun de na galaria de 180 metri.

N tunel sön la strada a Pontives va debojëgn por protezionè n tòch de strada y les ćiases fates sö tles vijinanzes dala tomada de peres, sciöche n valgönes ispeziuns di geologs y di tecnics dla Provinzia à desmostrè. “Dantadöt da d’aisciöda canch’al mët man da deleghé é le risch ch’al vëgnes jö peres cotan plü alt” à dit l’assessur Mussner che conësc la strada dër bun. “Al é gran’ ora da fà valch scenò réstel inant le prigo ch’al vëgnes jö te strada peres de na grandëza ćina a 10 metri cubich”, à splighé l’assessur provinzial ai Laûrs publics. Te n pröm momënt gnaràl slarié fora rëis de proteziun cuntra la tomada de peres y fat sö mürs de proteziun. I laûrs gnarà scrić fora tla proscima edema y ai pröms de merz 2005 él preodü de mëte man cun i laûrs. Do ch’al é gnü stlüt jö chisc laûrs pol mëte man la secunda fasa d’intervënt: al gnarà fat sö na galaria de 180 metri de lunghëza por protezionè n tòch de strada y les ćiases ilò dlungia. La galaria costarà 1,3 milius d’euro. I tecnics dla Provinzia é tl laûr d’arjigné ca le proiet; cun i laûrs gnaràl metü man tl 2006.

USP

Galaria dales fotografies