USP - En gaujiun dl dé dla porta daverta incö mercui, ai 16 de forà 2005 à les scolares y i scolars dla Scora d’ert “Cademia” a Urtijëi presentè süa scora y sü laûrs artistics. Sot al moto “Pop in day” à chi che é gnüs a vijité la scora ince podü deventè instësc creatifs.
An à ince podü amiré le Body-Painting pro le "Pop in Day" dla "Cademia"Che la “Cademia” mët tl zënter l’ativité creativa é stè incö, tratan le dé dla porta daverta, por düć da odëi. I scolars y sü insegnanć à presentè la scora cun les direziuns de stüde Pitöra, Scoltöra y Grafica publizitara y à sambëgn inće portè dant n valgönes operes che é gnüdes cheriades tratan scora. Chi che â interès à inće podü tó tla man le raisplais, le pinel o le scarpel y porvè instësc. “La scora d’ert é n post olache l’ert vir y olache al nasc l’ert dl dagnì tres les idees nöies dles scolares y di scolars” à dit l’assessur Florian Mussner, che é sovënz jü tla scora d’ert ti ultimi agn. Jì fora por i porti de chësta scora é sciöche passè tres na mostra fora, s’à Mussner tut a dì. La scora d’ert n’é nia ma na pert dl paîsc y dla valada mo ara é inće n punt de referimënt por la cultura ladina. “Le fin de chësta manifestaziun é chël de ti mostrè ales zitadines y ai zitadins sciöche la scora s’à mudé cun le passè di agn” à sotligné le diretur Karl Heinz Mureda pro le “Pop in day”. A scora ne se tràtera nia ma de arjunje de bogn resultać, mo al vëgn inće damanè de bones idees y umanité. De plü informaziuns sura la Scora d’ert “Cademia” de Urtijëi él da ciafé sot al numer de telefonn 0471 796240 y te internet sot a www.schule.suedtirol.it/ks-groeden/.
USP
Galaria dales fotografies
An à ince podü amiré le Body-Painting pro le "Pop in Day" dla "Cademia"
